Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. Que ne porroient .xxx .somier porter

  2. Tant en ferons et despendre et doner

  3. Dedanz Pavie ainz q an doions torner

  4. Que li plus povres s en porra bien loer

  5. Ja n i ferons nostre mengier veer

  6. A pelerin qui o nos veille entrer

  7. N a trespasant c ait mestier de souper

  8. N omme qui sache deduire ne chanter

  9. Ne un ne autre n en ferons destorner

  10. Dist Boniface Gentil estes et ber

  11. Se vos volez tel barnaje mener

  12. Dont estes vos trop riche

  1. Rois Boniface fu nobiles et fiers

  2. Mes molt li poise des gentis mesagiers

  3. Qui si refusent son boivre et ses mengiers

  4. Avis li est que c est granz reproviers

  5. Se ses viendes preissent volentiers

  6. Ennor li fust ses en eust plus chiers

  7. Et li mesage descendent des destriers

  8. Les ostieus ont fet prendre as escuiers

  9. Et Boniface s en vet endementiers

  10. Devant lui fet mender les bolengiers

  11. Et toz les fevres et toz les taverniers

  12. Toz les ciriers avec les poisoniers

  13. Ceus qui fein vendent et toz les aveniers

  14. Ceus qui char vendent et avec les merciers

  15. Les peletiers et les cordoenniers

  16. Toz ceus qui font en la vile mestiers

  17. Seignor ce dist Boniface li fiers

  18. Ci a venu .lx .mesagiers

  19. Ainz mes ne vi si nobles chevaliers

  20. Toz dus et contes et molt riches terriers

  21. N i a celui qui n ait .v .escuiers

  22. En destre font mener les bons destriers

  23. Et granz avoirs trouser sor les somiers

  24. Portent faucons ostoirs et espreviers

  25. Chiens et brachez et viautres et levriers

  26. A vos coment qui faites les mestiers

  27. Que lor vendoiz toz voz avoirs si chiers

  28. Une denree .ij .solz ou .xx .deniers

  29. Aincois que past demain li jorz entiers

  30. Mengeront il avec moi volentiers

  31. Sire font il par les sainz de Poitiers

  32. Cist bans nos est a fere molt legiers

  33. Se acheter vellent de noz mestiers

  34. Nos lor vendrons mien escient si chiers

  35. C onques viande outre mer as paumiers

  36. Ne fu si chier vendue

  1. Rois Boniface s en vet en son donjon

  2. Par la cite herbergent li baron

  3. Es bons ostieus antor et environ

  4. Font aporter vitaille a tel foison

  5. Com se trestout ne coutast .j .bouton

  6. Qui ot a vendre bon luz ou bon saumon

  7. Mar le feist s a deniers peser non

  8. Avoir en pot tant comme il li fu bon

  9. .C .mars d argent .j .ors i vendoit on

  10. Et .xxx .livres .j .cras cerf de seson

  11. Et la perdriz vendoit on .j .mengon

  12. Et la geline .x .solz o le chapon

  13. Ainz ne troverent si chiere venoison

  14. Si chier oisel char fresche ne poisson

  15. Tant chier lor fust vendue a desreson

  16. Qu il an prisassent la chierte .j .bouton

  17. De tot en font porter a tel foison

  18. Com s il eussent tout trove a bandon

  19. Ce resanble barnaje

  1. Molt demenerent li baron grant fierte

  2. Le pain font querre par tote la cite

  3. Qui ot gastiax ou blanc pain belute

  4. Vendre le pot si a sa volente

  5. Que mieux l en fu jusq a .j .an passe

  6. Car tant menoient largece et richete

  7. Q ainz ne troverent de riens si grant chierte

  8. Qu il n en eussent ausin large plente

  9. Com s il eussent tot por neant trove

  10. Ce jor meismes n i ot plus demore

  11. S en vet .j .mes el grant palais liste

  12. A Boniface l avoit dit et conte

  13. En non Deu sire or torne a folete

  14. Ce c a voz homes aviez comende

  15. Cil mesagier qui sont en la cite

  16. Demeinent trop orgueil et grant fierte

  17. Il n ont poisson en la vile trove

  18. Oisel ne char qu il n en aient porte

  19. Vostre cite ont mise en tel chierte

  20. Que pelerin n omme de mere ne

  21. N i truevent riens por denier monnee

  22. Tant en ont ja cist mesage achete

  23. Qant li rois l ot forment l en a pese

  24. Par foi fet il or me torne a vilte

  25. Apres ce ban ra plus fort commende

  26. Que il n i ait estrenge ne prive

  27. Povre ne riche n omme de mere ne

  28. Qui buche vende por denier monnee

  29. As mesagiers qui la sont ostele

  30. Qant ce entandent li prince et li chase

  31. Qui lor mengier avoient achete

  32. Sachiez de voir ne lor fu pas a gre

  33. Entr eus en sont a .j .conseil ale