Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. Mes ainz qu eussent lor mulet estale

  2. Vindrent pres d eus li mesage menbre

  3. Et qant li rois voit qu il sont adobe

  4. Et a choisi des armes la clarte

  5. Voit tante ensengne tant panon de cende

  6. Et tant hauberc et tant escu liste

  7. Et tante lance et tant hiaume jeme

  8. Tel poor ot tout a le sans mue

  9. Dist a ses homes Folie avons pense

  10. Que pelerins cuidons avoir trove

  11. Ce ne sont pas pelerin en non De

  12. D aler a Rome n ont pas cist volente

  13. Nul pelerin ne vont ainsi arme

  14. Car cist si ont armes a grant plante

  15. Et lor bordon si sont lonc et ferre

  16. Bien senblent gent de mal fere apense

  17. Cil de Torins ce sai de verite

  18. Et de Barbastre m ont molt coilli en he

  19. Gaitier me font plus a d un an pase

  20. S il me tenoient assez avroie ovre

  21. Je crien que ci n aions trop demore

  22. Car ge ne sai que cist ont en pense

  23. Alons en tost en la bone cite

  24. Si lor fermons les portes

  1. Rois Boniface s en est tornez fuiant

  2. Droit vers Pavie a esperon brochant

  3. Et tuit si home le vont de pres sivant

  4. Cil fu ainz enz qui ot cheval corant

  5. Qant il sont enz lie en sont et joiant

  6. Les portes ferment apres eus maintenant

  7. Puis sont monte sor les murs par devant

  8. Nostre baron s en vont molt merveillant

  9. Dist l un a l autre C est deable grant

  10. De nule part ne trovons biau senblant

  11. Vez Boniface que alions querant

  12. Or l avions ci trove maintenant

  13. Si cuidions dire nostre talant

  14. Mes or s enfuit a loi de recreant

  15. Totes les portes nos fet fermer devant

  16. Or nos poons hors herbergier au vent

  17. Que anz avons mauves herbergement

  18. De Rosillon Girarz parla avant

  19. Seignor baron ne vos esmaiez tant

  20. Li rois est ci dedanz son chasement

  21. Si puet bien fere auques de son commant

  22. Ne savez pas ore son hardement

  23. Par aventure il ne voit pas sovant

  24. En cest pais venir si fete gent

  25. Qui avec eus portent tant garnement

  26. Si nos fet clorre ses portes au devant

  27. Por ce qu il n a de guerre nul talant

  28. Mes or alons avant tot sagement

  29. Je parlerai a lui premierement

  30. Se poions parler tant sagement

  31. Qu eussions pris leanz herbergement

  32. Foi que doi Deu qui ne faut ne ne ment

  33. Ne criendrions puis son dangier granment

  34. Ainz porrions parler seurement

  35. Dient li conte Ci a conseil molt gent

  36. Alons en dont sanz nul arestement

  37. Gardez que vos aiez bon escient

  38. Por rover la pucele

  1. Francois chevauchent sanz plus de demorer

  2. De ci as portes ne vodrent arester

  3. Voient le roi desor les murs monter

  4. Li dus Girarz fist forment a louer

  5. Et molt sot bien cortoisement parler

  6. Ou voit le roi seu prist a saluer

  7. Cil Damedeus qui nos dengna former

  8. Et que devons et croire et aorer

  9. Gart Boniface le roi qui tant est ber

  10. Amis fet il et cil te puist sauver

  11. Que ge t oi ci amentoivre et nomer

  12. Quele gent estes nel me devez celer

  13. Cortoisement ses ta reson conter

  14. Sire fet il ja l orroiz sanz fauser

  15. Mesagier somes ne vos covient douter

  16. Pes et amor vos venons aporter

  17. N avons talant de guerre demener

  18. Mes ennuit mes nos fetes osteler

  19. Dedanz Pavie seu volez creanter

  20. Jusq au demain que il sera jor cler

  21. Dist Boniface Ja nel vos quier veer

  22. Tantost lor fet les portes desfermer

  23. Et a chascun fist bon ostel livrer

  24. Puis les en prist molt bel a apeler

  25. Seignor fet il .j .don vos veil rouver

  26. Et par amor le vos veil demander

  27. Que tuit soiez avec moi au souper

  28. Et le matin encores au disner

  29. Tant com vodroiz avec moi sejorner

  30. Vos ferai toz richement conreer

  31. Ne quier que ja vos doie riens couter

  32. Sire font il ce fet a mercier

  33. Mes por .c .mars de fin or et de cler

  34. Nel porrions otroier ne greer

  35. Car trestuit somes riche baron et per

  36. S avons tout ce que volons demander

  37. Puis ier en ca ce sachiez sanz fauser

  38. Nos a Dex fet plus d avoir conquester