Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. De Monpancier a Guiz premiers parle

  2. Seignor fet il or nos fet grant vilte

  3. Rois Boniface qui ce a comende

  4. Mengier char crue n avons pas ause

  5. Se la menjons ce sera laschete

  6. En noz pais nos sera reprove

  7. Par ce Seignor qui le mont a forme

  8. Se volez croire mon dit et mon pense

  9. Ja serons tuit maintenant adoube

  10. Si asaudrons ce roi desmesure

  11. La sus amont en son palais liste

  12. Ocirons le voiant tot son barne

  13. Puis enmenrons sa suer au cors molle

  14. Voiant sa gent et s en aient mal gre

  15. Ce dist Girarz Onques ne soit panse

  16. N est pas barnajes de fere folete

  17. Dont n est il sires et rois de son regne

  18. Droiz est q an face ce qu il a commende

  19. Puis que des buches a l en son ban crie

  20. Si achetons groses noiz a plente

  21. Et de bon madre henas s il sont trove

  22. Puis qu il seront dedanz le feu gite

  23. Ne verroiz rien qui giete tel clarte

  24. Trop somes nos plein de grant richete

  25. Prince et baron de molt haut parente

  26. Se despandons .m .mars d argent pese

  27. Ne nos en soit vaillant .j .oef pele

  28. Mes c a l ennor Aymeri le menbre

  29. Aions ce fet qu il nos a commende

  30. Dient li conte Molt avez bien parle

  31. Ainsi ferons com l avez devise

  32. A ce qu il dit se sont tuit acorde

  33. Lor ban refont crier par la cite

  34. Qui henas a chier seront achete

  35. Li borjois l oient n i ont plus demore

  36. Desoz lor chapes en ont tant aporte

  37. Que il en ont .j .grant mont entasse

  38. Si chier lor vendent com il lor vint a gre

  39. A bon argent et a fin or pese

  40. Si grant avoir lor en furent done

  41. Et cil vilain rameinent a plante

  42. Muls et somiers qui sont de noiz trouse

  43. Qu il ont vendues tot a lor volente

  44. Et li Francois ont tot el feu gite

  45. Des bons henas qu il ont fret et casse

  46. Et de noiz jauges ont le feu alume

  47. La flanbe i fiert qui giete grant clarte

  48. De ci as lates sont li brandon vole

  49. Par pou qu il n ont tot ars et enbrase

  50. Lonbart en sont forment espoente

  51. Dist l un a l autre Mal nos est encontre

  52. Ce sont ici vif deable et maufe

  53. Tuit li domage en soient retorne

  54. Sus Boniface le fol bricon prove

  55. Qui les mist en Pavie

  1. Vint jorz sejornent li baron et li per

  2. Si richement com en puet deviser

  3. Font chascun jor les mengiers conreer

  4. Les venoisons et les ors font tuer

  5. Et qant les ont fet cuire et atorner

  6. N en dengnent il se petit non gouster

  7. Aincois font tot departir et doner

  8. Ja ne feront lor mengier deveer

  9. A nul qui veille ne venir ne aler

  10. Et cil qui veut en puet assez porter

  11. Lonbart le voient qui estoient aver

  12. Lor grant despans ne puent endurer

  13. .I .mesagiers le vet au roi conter

  14. En non Deu sire molt fetes a blasmer

  15. Qant ces mesages fetes ci sejorner

  16. Ainz tel orgueil ne vi mes demener

  17. A roi n a conte n a prince ne a per

  18. En tel chierte font la vile torner

  19. Que trespasant n i puent osteler

  20. Ne il n i truevent viende a acheter

  21. Gentis rois sire fetes les en torner

  22. Li rois l antant n ot en lui c airer

  23. Par foi fet il or me doit molt peser

  24. Je les ferai par devant moi mender

  25. Sire fet il ja n en estuet parler

  26. Ainz verriez la quinzaine paser

  27. Q an vostre ostel en dengnast .j .entrer

  28. Por ce que trop les feistes irer

  29. Qant lor feistes la buche deveer

  30. Ce resenbla folage

  1. Dist Boniface Par Deu le fil Marie

  2. Tout voirement fu ce molt grant folie

  3. Qant de la buche fis fere tel banie

  4. Car li baron sont de grant seignorie

  5. Riens que facons ne prise une alie

  6. Molt tost porroit torner a estoutie

  7. S auques ainsi demorent en Pavie

  8. Mes ainz que plus soit la vile enchierie

  9. G irai a eus si ne demorrai mie

  10. Lors vait monter el mulet de Sulie

  11. Et moine o lui de sa gent grant partie

  12. .XXX .Lonbarz ot en sa conpangnie

  13. Mes ainz qu il isse de la sale voltie

  14. Rois Boniface les ensengne et chastie

  15. Et toz ensenble molt gentement lor prie