Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. L un de picois li autre de congnie

  2. Fierent as murs ensenble a une hie

  3. Tost en eussent abatu grant partie

  4. Qant Charles vint sor .j .mur de Sulie

  5. Ou qu il les voit hautement lor escrie

  6. Mar abatez franche gent seignorie

  7. Je ne vodroie por tot l or de Sulie

  8. Que abatue feust ne agastie

  9. La forterece de la cite entie

  10. Car se Deu plest le fil sainte Marie

  11. Sanz trebuchier sera prise et sessie

  12. Par cel apostre que l en requiert et prie

  13. Ainz i serai .vij .anz a ost banie

  14. Et menderai por fere vos aie

  15. L arriere ban de France la garnie

  16. Ja n i guerront la pute gent haie

  17. S il ne rendent Nerbone

  1. Qant ce entandent sergent et chevalier

  2. Que les hauz murs n oseront pecoier

  3. Et que l asaut lor covient a lessier

  4. Sachiez de voir en eus n ot qu airier

  5. Dist l un a l autre Ci a grant destorbier

  6. James en France ne porrons reperier

  7. Ne ne verrons ne enfant ne moillier

  8. A icest mot se retraient arrier

  9. Li franc sergent et li franc escuier

  10. C as murs abatre n oseront plus tochier

  11. Qant c ont veu li hardi chevalier

  12. Molt tost se vont armer et haubergier

  13. Par ire vont l asaut recommencier

  14. .XIIII .eschieles ont fet as murs drecier

  15. Qui tant sont granz c on les puet apoier

  16. Sor les creniax fermer et atachier

  17. Et Charlemaine l enperere au vis fier

  18. Fist le berfroi apres les murs sachier

  19. Par force i montent et sergent et archier

  20. Les arbalestes ont li arbalestier

  21. A col il traient maint fort carel d acier

  22. Li archier font saietes descochier

  23. As paiens traient qu il voient arengier

  24. Desor les murs por les pierres lancier

  25. Maint en ocient que il font trebuchier

  26. De sus les murs en la cite arrier

  27. Qui dont oist Sarrazins gramoier

  28. Uler et brere et Mahomet huchier

  29. D une grant liue oist l en le noisier

  30. Et li Francois ne se vellent targier

  31. De totes parz font l asaut commencier

  32. Que ne sorent paien quel part gaitier

  33. Mes Aymeris qui tant fet a proisier

  34. Desor toz autres ce puis bien afichier

  35. Se penoit bien de l asaut enforcier

  36. A tot .c .homes qui molt l avoient chier

  37. Fist a la porte .j .fort asaut plenier

  38. Li .xx .tenoient .xx .granz haches d acier

  39. Le jor i furent merveillex charpantier

  40. Car tant i fierent et devant et derrier

  41. Que les ais font totes fandre et percier

  42. Et par devant font le flael brisier

  43. Et cil dedanz ne se porent gaitier

  44. Que dedanz n entrent li vaillant chevalier

  45. Mes qui que fust en la qeue derrier

  46. Cuens Aymeris i est entrez premier

  47. Lors veisiez Sarrazins destranchier

  48. L un mort sor l autre verser et trebuchier

  49. Que ne lor ot lor deffanse mestier

  50. Fuiant s en vont vers le pales plenier

  51. A haute voiz commencent a huchier

  52. Mahomet sire car nos venez aidier

  53. Vers le pales s en cuident reperier

  54. Mes ainz qu i fusent li cuivert pautonnier

  55. En ont ocis Francois plus d un millier

  56. Qui la veist conte Aymeri aidier

  57. Paiens ocirre au branc forbi d acier

  58. Testes et bras et piez et poinz tranchier

  59. Molt le deust aloser et proisier

  60. Tant fiert li cuens et avant et arrier

  61. Et avec lui maint vaillant chevalier

  62. Que il s en entrent el grant pales plenier

  63. El mestre estage fet s ensengne drecier

  64. Cuens Aymeris et au vent baloier

  65. Charles li rois si l apercut premier

  66. Naimon apele son mestre conseillier

  67. Vez sire dus dist Charles au vis fier

  68. La merci Deu qui tot a a jugier

  69. Cuens Aymeris s est ja fet herbergier

  70. Je voi s ensengne la au vant baloier

  71. Foi que doi Deu le verai jostissier

  72. Bien doit tenir la terre

  1. Sus el pales en l estaje plus grant

  2. Fu Aymeris au coraje vaillant

  3. Sone son cor hautement en oiant

  4. Ce senefie qu il est leanz avant

  5. Qant l enperere entendi l olifant

  6. En la vile entre a esperon brochant

  7. Et li baron le vont apres sivant

  8. D or et d argent troverent leanz tant

  9. Que plus n en ot ne roi ne amirant

  10. Et qui vost armes ne destrier auferrant

  11. Hauberc ou hiaume ou espee luisant