Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. Si vont le secors querre

  1. Vont s en li mes n i sont plus demorant

  2. Par desoz terre s en sont torne errant

  3. Si ont erre par nuit et par jor tant

  4. De la croute issent lez Orenge la grant

  5. Qui estoit lor et Nimes par devant

  6. D eus vos lerons a maufe les commant

  7. Dirons de Charle l enpereor puissant

  8. Et d Aymeri le preu conte vaillant

  9. Qui vers paiens orent grant mautalant

  10. A un matin par son l aube aparant

  11. Fist l enperere soner .j .olifant

  12. Lors s arment tuit chevalier et sergent

  13. Vont a l asaut dont molt sont desirrant

  14. Nerbone asaillent et derriere et devant

  15. Molt se deffandent Sarrazin et Persant

  16. En la cite nen ot petit ne grant

  17. Qui ne montast sor les murs maintenant

  18. Gietent grans pierres li cors Deu les cravant

  19. Et pieus aguz contreval en lancant

  20. Cui il consivent il n a de mort garant

  21. Charles le voit s an ot le cuer dolant

  22. Il les maudit de Deu onipotant

  23. Dex vos confonde Sarrazin et Persant

  24. Vos me tolistes Olivier et Rollant

  25. Les .xij .pers que ge amoie tant

  26. Mes par l apostre que quierent peneant

  27. Ainz que m en aille en France la vaillant

  28. Vos vendre ge molt chier mon mautalant

  29. L engigneor en apela Morant

  30. Et Savari et son frere Jordant

  31. Fetes moi tost .j .angin fort et grant

  32. Et ausin haut comme cis murs devant

  33. Par coi prendrons ce pales reluisant

  34. De mon avoir vos ferai doner tant

  35. Que vos seroiz toz jorz riche et menant

  36. Et cil responent Tot a vostre commant

  37. Charpanter font les engins maintenant

  38. Toute jor ovrent jusqu au soleil cochant

  39. Et tote nuit a lanternes ardant

  40. Des charpantiers ont mis a l ovre tant

  41. C au main tenoient les engins en estant

  42. Vers la cite vont le berfroi traiant

  43. Desus monterent et archier et sergent

  44. Qant veu l ont Sarrazin et Persant

  45. Dist l un a l autre Molt sont Francois sachant

  46. Or nos amoinent .j .enchantement grant

  47. Tuit somes mort vaincu et recreant

  48. Nostre mesaje vont la briche querant

  49. Eincois c aions secors de l amirant

  50. Avrons perdu Nerbone

  1. Charles a fet le berfroit haut lever

  2. Et pres des murs et conduire et mener

  3. Et les perrieres fet deseure porter

  4. Por fere a ceus de la cite giter

  5. Lors en prist Charles Naimon a apeler

  6. Naimes biaus sire se le volez greer

  7. Par tote l ost fetes .j .ban crier

  8. Que trestuit s arment sanz plus de demorer

  9. Ja n i remengne sergent ne bacheler

  10. Ne un ne autre qui armes puist porter

  11. Que maintenant ne s aillent adouber

  12. Si les ferons toz a l asaut aler

  13. Sire dist Naimes bien fet a creanter

  14. Lors font par l ost cors et tronpes soner

  15. Dont veisiez ces chevaliers armer

  16. N i a remes duc ne conte ne per

  17. Ne escuier sergent ne bacheler

  18. Ne soit armes por a l asaut aler

  19. Carles meismes lor prist a escrier

  20. Franc chevalier hui vos covient pener

  21. Por l amistie Jesu Crist conquester

  22. Hui se porront li hardi esprover

  23. Les engins fetes contre ce mur lever

  24. Qui porra ainz dedanz Nerbone entrer

  25. De mon tresor li ferai tant doner

  26. Com il meismes osera deviser

  27. Qant il oirent le roi ainsi parler

  28. Des tantes partent sanz plus de demorer

  29. De ci as murs n i vodrent arester

  30. Les engins font pres des murs roeller

  31. La veisiez ces fiers sergenz monter

  32. Qant l ont veu Sarrazin et Escler

  33. Poor ont de lor vie

  1. A cel assaut ot molt fiere aatie

  2. Molt avoit Charles bone gent et hardie

  3. As murs asaillent par molt grant arramie

  4. Qant c ont veu la pute gent haie

  5. N i a celui n ait poor de sa vie

  6. Sor les murs montent de la cite entie

  7. Gietent granz pieus li cors Deu les maudie

  8. A noz genz ont mainte teste croisie

  9. Et enbarre maint hiaume de Pavie

  10. Francois le voient chascuns molt s engramie

  11. Mes por ice l asaut ne lessent mie

  12. Ainz recomencent plus fiere l asaillie

  13. Les vergiers copent dont bien estoit garnie

  14. La place entor plus d archiee et demie

  15. Les fossez enplent par molt grant aatie

  16. De ci as murs s en vont tuit d acoillie