Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. Assez en pot avoir a son talant

  2. Dex tant i trovent pain et vin et froment

  3. Et char salee et de fresche ensement

  4. La cite ot bien garnie Agolant

  5. Li rois qui tint le mestre mandement

  6. Et si troi frere qui furent roi puisant

  7. Mes li dui furent plus fol et non sachant

  8. Qu erent remes en Nerbone la grant

  9. Et Aymeris au coraje vaillant

  10. Ot ces .ij .pris entre lui et sa gent

  11. Rendu se furent qant ne porent avant

  12. Et Aymeris les ot fet maintenant

  13. Dedanz sa chartre metre sanz nul garant

  14. Dont puis n isirent en trestot lor vivant

  15. Et li dui autre puent d ore en avant

  16. Par loisir querre le secors l amirant

  17. Car Charlemaine li rois au poil ferrant

  18. Et Aymeris qui tant ot hardement

  19. Jurent la nuit el plus haut mandement

  20. Et lor riche conpangne

  1. Qant ce ot fet Charlemaine li ber

  2. Qu il ot Nerbone qui tant fet a loer

  3. Ce poez croire grant joie en dut mener

  4. Des sinagogues fist les Mahons oster

  5. L or et l argent en fist tot esgruner

  6. A ceus le fist departir et doner

  7. Qui remendront a la cite garder

  8. Un biau mostier font fere et conpaser

  9. Et les autieus beneir et sacrer

  10. Puis i ont fet establir et poser

  11. Un arcevesque sanz plus de demorer

  12. Por Damedeu servir et ennorer

  13. Si i fist Charles offrir et presanter

  14. Le chief saint Pol ce dit en sanz fauser

  15. Qu il fist d Espengne avec lui aporter

  16. De ce fist il molt que gentis et ber

  17. Que au mostier a fet messe chanter

  18. Ainz qu il vosist de Nerbone torner

  19. Molt grant offrende i fist li rois doner

  20. Et li baron et li conte et li per

  21. I vont chascuns s offrende presanter

  22. Un besant d or o .j .marc d argent cler

  23. Apres la messe ne vost plus demorer

  24. Li rois ainz fet tout son oirre aprester

  25. Lors veisiez ces chevax enseler

  26. Metre ces frains e ces hernois trouser

  27. Grant joie font ce sachiez sanz douter

  28. De ce q an France s en doivent retourner

  29. Charles li rois n i vost plus sejourner

  30. Au departir en prist a apeler

  31. Aymeri de Nerbone

  1. Charles parole a la fiere vigor

  2. Aymeri frere molt avez bele tor

  3. Riche cite biau pales riche ennor

  4. Dedanz l estage del tans enciennor

  5. Porroiz menoir a joie et a baudor

  6. Vitaille avez a vos vivre maint jor

  7. S avez ceanz maint destrier misodor

  8. Et bones armes de diverse color

  9. Haubers et hiaumes et escuz painz a flor

  10. Mar douteroiz cele gent paiennor

  11. S avez besong prez sui que vos secor

  12. Grant merci sire ci a molt grant amor

  13. Respont li cuens qui molt ot de valor

  14. Si m eist Dex le pere criator

  15. Tant com vivrai vos tendre a seignor

  16. Et si n aiez onques de ce poor

  17. Que tant com puisse monter el misodor

  18. N avront paien ancontre moi sejor

  19. Tant com vivrai les metrai en error

  20. Ja envers aus ne quier avoir amor

  21. Ainz les metrai a duel et a tristor

  22. Tot por l amor Rollant le pongneor

  23. Et Olivier le nobile contor

  24. Et por les autres qui tant orent valor

  25. Q an Rancevax furent mort a dolor

  26. Par Ganelon le felon traitor

  27. A cui Dex doint et honte et desennor

  28. Frans enperere por Deu le criator

  29. Qant vos vendroiz en la terre Francor

  30. Vangiez vos en n i fetes lonc sejor

  31. Com l an doit fere de felon traitor

  32. Si que trestuit li grant et li menor

  33. L oient conter jusqu en Inde major

  34. Et que poor en aient traitor

  35. Si que james vers lor lige seignor

  36. N osent panser einsi grant desennor

  37. Et dist li rois Par Deu le sauveor

  38. Vos dites bien Dex vos croisse valor

  39. Or vos penez de garder vostre ennor

  40. Dist Aymeris De ce n aiez poor

  41. Car se Deu plest le verai criator

  42. N en perdrai ja demi pie ne plain dor

  43. Par la gent Sarrazine

  1. Charles li rois n i fist plus demoree

  2. Arrier s en vait en France la loee

  3. Aveques lui en a sa gent menee

  4. A Aymeri a Nerbone donee

  5. Et avec lui lessa en la contree

  6. Mil chevaliers de molt grant renommee