Et les batailles commencent a venir .
Toutes rengiees,l ‘une vers l ‘autre vint
Le petit pas,n ‘i ot que du ferir .
Primes desrenge le vallet Fromondin ;
L ‘escu du col tenoit devant son vis ;
.I .chevalier vet malement ferir,
Que les estriers li fet en .II .guerpir .
Puis abat l ‘autre si que l ‘en bien le vit,
Et deu tronçon vet durement ferir .
Tretuit escrient :«Ore après Fromondin !»
Son renc sormonte,s ‘a son poindre forni .
Entre .II .rens vus abati Tierri,
Devers senestre le Flamant Baudoïn .
Bien puet li enfes son haut poindre fornir
A tant de gent comme il vint après li,
Que ja par home n ‘i avra contredit
Juques dus Begues n ‘i vegne de Belin
Et son neveu le Borgoing Auberi ;
Mes il se dorment si com il m ‘est avis .
Et li conroi furent ensemble mis .
La veïssiez grosses lances tenir
Et chevaliers contre terre flatir,
Dont li cheval fuient par le larris,
Et li navré se claimment las,chetis .
Lieve la noise et enforce li criz .
En .IIII .leus ou en .V .ou en .VI .
Fu li tornoiz et li abateïz .
Qui duc veïst Guillaume de Monclin
Et dant Bernart,le segnor de Nesil,
Et la mesniee Fromont le posteïf,
Aus brans d ‘acier la presse departir !
Tretoz li fes en vint desus Garin ;
.IIII .chevaus li ont souz li ocis ;
Li dus s ‘en torne qui ne pot plus souffrir .
Desconfit fussent François et Engevin,
Breton,Normant,por le fes soutenir ;
Mais les granz genz Fromont le posteïf
Sus l ‘estendart font les noz resortir .
«Dieus !dit li rois,aïde,S .Denis !
Deffendez moi,ne soie morz ne pris .
Icete gent ne porroit nus souffrir .
Et ou est ore dus Begues de Belin,
Qui a els s ‘est durement aatiz ?»
.I .chevalier,qui de langue servi :
«En nom Dieu,sire,ce fu aprés le vin,
Oublié l ‘a,en nonchaloir l ‘a mis ;
Vus nu verroiz hui en estor venir .»
.I .escuier que Begues ot norri,
Molt l ‘en pesa quant la parole oï,
Molt fierement parole et si li dit :
«Danz chevaliers,vos i avez menti :
Li dus se dort qui anuit l ‘aguet fist ;
Geu vuel aler orendroit estormir .»
Le destrier point des esperons d ‘or fin .
Dedenz le tref entra,ou li dus gist :
«Levez sus,sire,trop i poëz dormir,
Que li tornoiz se velt ja departir .
A la promesse,ce cuit,avez failli,
Que vos feistes Rigaut le filz Hervi .
—Ça mon cheval !li Loherans a dit,
Envoiez querre mon neveu Auberi .»
Ainz que li dus sus son cheval seïst,
Li baron viennent et li dus Auberis .
Molt doucement lor a proié et dit :
«Segnor baron,je me sui aatiz
Envers Fromont et envers Fromondin .
De mort me heent,bien le savez de fi,
Encui verroiz bon chevalier en mi,
Prenez vos garde de moi,je vus en pri .
—Molt volentieirs,sire,»dist Auberis .
Li dus s ‘entorne et ses genz autresi .
Bruient banieres et panoncel petiz ;
Cil escu hurtent aus hiaumes poitevins
Et li hauberc aus seles a or fin .
Lieve la poudre et li airs obscuri .
Li caillou brisent et li feus en sailli .
.I .grant arpent dus Begues de Belin
S ‘en vint avant plus c ‘uns ars ne tressist ;
Bernart encontre,si l ‘a a reson mis :
«Ou est alez vostre niès Fromondins ?
Son cheval ai donné a Rigaudin .
—Ne l ‘avrez mie »,li quens Bernarz a dit .
Begues l ‘entent,a pou n ‘enrage vis,
Grant cop li donne de l ‘espié poitevin,
Tout estendu l ‘abat enz eu chemin .
Après abat Guillaume de Monclin ;
Le tierz a fet de male mort morir ;
Sa gent sormonte,s ‘a son poindre forni
Et tint s ‘espee Frobierge au pont d ‘or fin ;
Entr ‘eus se fiert li dus et si s ‘i mist,
Coupe visages et cos et braz et piz,
A grant dolor en fet ames partir .
Dieus !a quel poine Guillaumes de Monclin
Est remonttez et Bernarz de Nesil !
Bien i parut quant dus Begues i vint .
«Chastel !»ecrie,por les suens resbaudir .
Les .III .batailles fet a une venir,
Pus les a fetes en la quarte flatir ;
Ferant les moines plus c ‘uns ars ne tressist ;
Au Bordelois a fet le champ guerpir