Li dus Begons de son aguet parti,
Par les entrees derriers en l ‘ost en vint,
Vint a son tref et ilec s ‘endormi .
Son escuier apela Lancelin :
«Oste la sele de mon destrier de pris,
Le dos li frote et la croupe autresi,
Pus li remez la sele,biaus amis .»
Tretoz armez se coucha en .I .lit,
Fors que s ‘espee nule riens n ‘i toli ;
Dist au Borgoing :«Fetes le autresi,
Plus serom fres quant nus orrons le cri .»
Li jorz fu biaus,li soulelz s ‘esclarci .
Li quens Fromonz se jesoit en .I .lit,
La fenestrelle .I .petitet ouvri,
Et la clarté le fiert enmi le vis .
Fromonz se lieve et chauça et vesti ;
Tretoz armez fors d ‘une chambre issi,
Cheval demande et l ‘en a fet venir .
Parmi la vile les corut estormir .
Vint a l ‘ostel son emfant Fromondin,
Trueuve l ‘enfant qui jesoit en son lit
Ou il se dort et volentiers le fist .
Bernart apele :«Esgardez de mon fil
Qui se deüst et acroistre et norrir .
Or li convient son blanc hauberc vestir .»
À voiz escrie :«Levez sus,Fromondins !
Tu ne doiz mie a cete heure dormir :
Li granz mengiers deüst estre garniz
Et li tornoiz failliz et departiz .»
L ‘emfant saut sus quant la parole oï .
.I .escuier i vint por li servir ;
En pou de terme l ‘ont armé et garni .
Li quens Guillaumes,le segnor de Monclin
Li ceint l ‘espee par la resne d ‘or fin .
Veant tretoz molt fierement li dit :
«Je te chasti,fet il,niès Fromondins,
Que tu pas n ‘aimes pautonnier ne frarin ;
Halz homs seras se tu longuement viz .
Or soiez preuz et conquerant toz dis,
Fel et estous contre voz anemis ;
Aimme prodome,done li ver et gris ;
Par cest afere,montteras en grant pris .
——Tout est en Dieu,sire,»dit Fromondins .
L ‘en li amoine .I .bon destrier de pris ;
Li vasaus monte,qui volentiers le fist .
L ‘escu ot d ‘or et .I .lyon en mi .
Parmi la guige a son col le pendi .
Les portes fet li quens Fromonz ouvrir,
Toz les serjanz en fet avant issir ;
Lices fet fere por lor cors garantir,
S ‘en lor fet force,ou se vorront tenir .
Primes s ‘en ist li vallez Fromondins,
Et après li Guillaumes de Monclin,
Et puis Bernart et Fauconnet son fil ;
Après s ‘en ist de Verdun Lancelin,
Forques et Hues et de Grant Pré Hienri,
Herbert de Troie,Huon de S .Quantin,
Pierre d ‘Artois,le Flamant Baudoïn,
Droon d ‘Amiens et son filz Amaurri ;
Après s ‘en ist li quens de Biauvoisin,
De Mondidier Girart et Cocelin ;
Aprés toz ceus segnor que je vos di,
S ‘en ist Guillaumes,li sires de Monclin,
Et de Boorges le preu conte Tierri,
Et de Lymoges Joceaumes et Baudri ;
Après s ‘en ist Fromonz li posteïs .
Li chevalier font la champaingne emplir :
La veïssiez tant vert hiaume bruni .
Fromonz devise ses genz por establir
Et ses batailles renge por mielz ferir .
En l ‘ost emforce et la noise et li criz,
La oïssiez cez buisines tentir,
Cez chevaliers a lor hostieus venir,
Les blans hauberz andosser et vestir,
Aus escuiers ces bons chevaus tenir .
La sont armé plus de .XL .M .,
Et sont ensemble,cui que doie enbelir .
Nostreemperere fet l ‘estendart venir ;
Molt l ‘a bien fet de chevaliers garnir
Et de serjanz por le fes soutenir .
Primes s ‘en ist de Mondaussois Tierri,
Gerart del Liege et l ‘Alemant Orri,
Renaut de Chol,de Bar le duc Hienri,
De S .Michiel quens Hues li floriz
Et d ‘Aspremont Tierri li posteïs ;
Après s ‘en ist li Loherans Garins,
Etaprès li Huon qui Troye tint,
Cil de Tonoirre et Gautier de Paris,
Et de Nuevers li frans quens Amaurris,
De Chaalons le franc conte Tierri,
Et dant Archarz,icil qui Riviers tint,
De Pierre Late Forquerez li petiz ;
S ‘en ist Aleaumes,Guichart qui Biaugeu tint,
Huon du Mans et Jeffroi l ‘Engevin ;
De Mondidier li dus Richarz s ‘en ist,
Et d‘Orlenois li frans dux Herneïs .
Encor se dort li Borgoinz Auberis,
Begues ses oncles,li Ardenois Tierris,
Gautiers del Neu,Huon de Quembroisi :
La nuit veillerent,por ce dorment einsi .