Mort Aymeri de Narbonne

Geste

Mort Aymeri de Narbonne: Numérisation de l'édition de Joseph Couraye du Parc sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Joseph Couraye du Parc , La mort Aymeri de Narbonne: Chanson de geste Firmin Didot Paris 1884 Société des anciens textes français Paris


  1. Qui bien fu fez et noblement ovrezs ;

  2. Dedenz fu mis lo cors a grant chiertés ;

  3. Ilueques furent et evesque et abé

  4. Et moine et clerc et provoire ordené

  5. Et li chanoine de la bone cités ;

  6. Tuit revestu ont lo conte enterrés ;

  7. Mès puis que Dex ot lo siecle estoré

  8. Ausi grant duel ne fu por home né,

  9. Com le fesoient por Aymeri lo bers :
    10. [ fol. 175 ]

  10. Se g’i metoie un des jors de l’esté,

  11. N’en averoie la moitié aconté .

  12. Ça et la gisent li chevalier pasmé,

  13. Et li baron sont en haut escriés :

  14. «Aimeri sire,de la vostre bonté,

  15. «Ne fu mès prince en la crestienté .

  16. «Vostre proece,vostre nobilité,

  17. «Vostre grant sens et vostre larjeté,

  18. «Ne porroit estre par nul home conté .

  19. «Tot aviez par valor sormonté,

  20. «Les chevaliers de la crestienté,

  21. «Princes et contes et demaines et pers,

  22. «Barons et dus et les rois coronez .

  23. «Chevalerie est chaüe en vilté .

  24. «Or seront mès Sarrazin resposés :

  25. «Par tote France feront lor volenté,

  26. «Que n’en seront par home destorné,

  27. «Puis que il sont de vos sol delivré »

  28. Ainsi ont tuit lo conte regretés ;

  29. Et li clerc ont lo servise finé,

  30. Plorant departent et estranje et privé

  31. Et li baron sont el palès entrés ;

  32. Mès Hermenjarz au jent cors enoré

  33. Tele par a si grant duel demené,

  34. Que por li ont tuit li baron ploré,

  35. Que puis n’ot joie en trestot son aés :

  36. Nonain devint et servi Damedé

  37. Por Aymeri que tant avoit amé,

  38. Dont onques puis n’ot lo duel oblié,

  39. Qu’ele en fu morte ançois un an passé .
    40. [ fol. 176 ]

  40. Grant duel en firent tuit cil de la cité,

  41. A saint Pol ont lo suen cors enterré

  42. Lez Aymeri lo conte .

  1. De grant duel fu la terre replenie

  2. Quant Aymeris ot finée la vie

  3. Mes ainz que fust la semaine conplie

  4. Se departi la riche baronies :

  5. Rois Looys a la chiere hardie

  6. Si s’en ala en France la garnies ;

  7. O lui mena sa grant chevaleries ;

  8. Molt en lessa qui ont perdu la vie

  9. Dont granz dels fu en la terre nobile .

  10. Li quens Guillaumes a la chiere hardie

  11. Vet a Orange sa fort cité garnie

  12. Ou lessiée ot dame Guibourc s’amies ;

  13. Onques pès n’ot a la jent paienie .

  14. Hernauz li ros ne s’i atarja mie,

  15. Droit a Gironde a sa voie adrecie,

  16. Et li dus Bueves a tot sa conpaignie

  17. S’en retorna a Commarchis sa vile,

  18. Et Guibelins qui ot grant seignorie

  19. O lui mena sa bele conpaignie

  20. Tout droitement a Andrenas la riches ;

  21. Et de Nerbone tint la terre en baillie
  22. [ fol. 177 ]
    Aymeriez qui ot la seignorie

  23. Que li dona ses parrains en sa vie

  24. Quant de ses filz ot fet la departie .

  25. Onques de princes dont chançons soit oïe

  26. N’issi tex oirs ne tel chevaleries ;

  27. Tant les ama Jhesus li filz Marie

  28. Qu’en paradis sont en sa conpaignie .

  29. Et l’estoire est ci en droit aconplie .

  30. Damedex gart toz cels qui l’ont oïe

  31. Et moi avuec qui la vos ai fenies ;

  32. Ne troverez qui avant vos en die,

  33. S’il ne fausse l’estoire .