Mort Aymeri de Narbonne

Geste

Mort Aymeri de Narbonne: Numérisation de l'édition de Joseph Couraye du Parc sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Joseph Couraye du Parc , La mort Aymeri de Narbonne: Chanson de geste Firmin Didot Paris 1884 Société des anciens textes français Paris


  1. Seignor,oez qui chançon demandez,

  2. Soiez en pès et si m’oez conter

  3. D’une aventure onques ne fu sa per,

  4. Coment les jestes vindrent a decliner,

  5. Les ancienes dont l’en soloit parlers :

  6. C’est d’Aymeri de Nerbone lo ber

  7. Et de son fil lo chetif Aïmer

  8. Et de Guillaume lo marchis au cort nés,

  9. De Charlemaine lo fort roi coroné

  10. Qui a ses filz dona ses heritez,

  11. A Looys et a Lohier l’ainznés :

  12. Lohiers en est en Alemaigne alez

  13. Et Looys est en France reméss ;

  14. Cil troveor les ont lessiez ester .

  15. Hui mès orrez du lignaje parlers :

  16. La jentil jeste doit on renoveler .
    17. [ fol. 2 ]

  17. Ce fu en mai que l’en dist en esté ;

  18. Fuellissent bois et raverdissent pré

  19. Et totes eves revienent en canel,

  20. Danz Aymeris de Nerbone li bers

  21. Seult adès fère les quintaines lever,

  22. Mès or se muert en sa bone cité .

  23. A Pentecoste,a une feste anuel,

  24. Granz fu li cors a Loon la cité ;

  25. Asez i ot et demaines et pers .

  26. Un diemenche au soir,après soper,

  27. S’est l’emperere en son estant levez :

  28. Si apela sa jent et son barné :

  29. «Seignor,»fet il,«un petit m’entendez .

  30. «Ici vos ai par devant moi mandez .

  31. «Venu i estes,si vos en sai bon gré .

  32. «A ceste feste me soliez enorer ;

  33. «Corone d’or i soloie porter,

  34. «Et hui encores m’est il renovelé :

  35. «Vos me soliez tenir en grant chierté,

  36. «Mès or sui vilz et entre piez botez1

  37. «Or me lessiez gerroier et foler :

  38. «Hues Chapez m’a malement grevé,

  39. «Arse a ma terre et mon païs gasté,

  40. «Et mes chastiax peçoiez et robez ;

  41. «De ci as portes de Paris est alez ;

  42. «Prise a la proie par devant la cité .

  43. «Grant honte fètes se vos l’i consentez ;

  44. «Homes parjures vos en puis apeler .

  45. «Mès une chose ai je or en pensé

  46. «Que je ferai,qui ne puet demorer .»

  47. Prent la corone qui molt fist a loer
    48. [ fol. 3 ]

  48. Ou li clou d’or reluisoient molt cler

  49. Que li palès en est enluminez :

  50. «Seignor,»fet il,«la corone prenez ;

  51. «Cui vos plera en fètes coroner :

  52. «Recluz serai a un de ces autés .»2

  53. XV .contor ont de pitié ploré,

  54. IIII .roi saillent qui l’ont recoroné :

  55. «Danz rois,»font il,«ne soiez si irez ;

  56. «Hues est mors,s’il puet estre trovez ;

  57. «Il en perdra la teste .»

  1. «Seignor baron,»dist li rois Looys,

  2. «Hues Chapez m’a malement bailli,

  3. «Arse a ma terre et gasté mon païs,

  4. «.XV .chastiax peçoiez et maumis,

  5. «Prise a la proie as portes de Paris .

  6. «Uns miens baron me seult venir servir :

  7. «C’est de Nerbone li frans quens Aymeris ;

  8. «Il est mes hom et souvent a voir dit,

  9. «Et Charlemaines,mes pere,lo nori

  10. «Et li dona Nerbonois a tenir ;

  11. «Tote a la terre quite et lo païs,

  12. «Lo suen conseil vodroie je oïr ;

  13. «Manderai lo annuit ou lo matin,

  14. «Si m’aidera ma guerre a maintenir

  15. «Contre Huon qui si m’a envaï .»

  16. Gautier apele de Termes,si li dist :

  17. «Sire fillex,»dist li rois Looys,

  18. «Vos en irez lo mesaje fornir

  19. «En Nerbonois au preu conte Aymeri ;

  20. «Si li direz viegne,soie merci,
    21. [ fol. 4 ]

  21. «A beles armes et a destriers de pris

  22. «En sa conpaigne de chevaliers .x .mil .

  23. — Volentiers,sire,»Gautiers li respondi,

  24. «J’irai sans plus atendre .»

  1. Li preus Gautiers en vint a son ostel,

  2. Ses armes rueve,l’en li va aporter .

  3. Il vest l’auberc qui fu au roi Lambé,

  4. L’elme laça ou l’escarbocle pert

  5. Si que par nuit rendoit tele clerté

  6. .M .chevalier en voient asez cler ;

  7. Il çaint l’espée a l’aufaje Barbé ;

  8. L’escu li ont si chanberlanc livré,

  9. Tarje roonde que l’en soloit porter ;

  10. La lance roide et l’espié noielé,

  11. A .v .clox d’or lo confanon fermé .

  12. Bauçant li ont en la place amené ;

  13. A grant merveille estoit bien atornez,

  14. Bele ert la sele que el dos ot fermé,

  15. Li arçon sont a cristal noielé

  16. Et les .ii .auves d’ivoire d’otre mer,

  17. La coverture de brun paile roé ;

  18. Mieudre destrier ne covint demander

  19. Por corre tost ne por soef aler .
  • 1. C Mès or sui veuz et chanuz et barbez.
  • 2. B Renduz, vers omis dans C.