Do vait baisier Landri et ausi fist Oli[v]e ;
L’empereres Pepins ne s’i oblia mie . [ fol. 171 ]
Salmadrine [la belle] s’en vint a dame Olive,
Par molt de foi[s] la baise,ne cesse ne ne fine ;
Dit Olive la belle :«Ma fille Salmadrine,
«Car pensez de mon filz,je vous requier et prie,
«De tout en vous me fie ;or en pensez,amie !
«Le lairai remanant,bien voi n’en menrai mie .
— Dame »dist Salmadrine,«j’en suis toute p[er]ie »
1 A grant peine ont fait entre eus la departie .
Plorent li chevalier et dames eschevies,
A Dieu le[s] recommande[nt] et li duc et li prince .
Et li roi[s] Alixandre en meine Salmadrine
Et Landri,cui il aime d’amour bien enterine ;
Li rois Pepins en meine Doon et dame Olive ;
A Coloigne s’en vienent a hore de complie ;
Diex !con grant feste en font li borjois de la ville !
Bien i fut conreé[e] toute la baronnie .
Quant vint a l’endemain,ne vos mentirai mie,
Pepin[s] ala en France,il et sa compagnie,
Et li dus de La Roche ot avec lui s’amie,
Dame Olive sa fame,en cui [il] molt se fie ;
En pais tenront la terre,ne est qui les guerrie .
Et Landris demora avec[que] Salmadrine ;
Enfans out de sa fame,qui est de bone orine,
Qui puis [tinrent en pais] la terre dame Olive,
Toute Constantinoble,la grant cité antie,
Et quanque il i apent et roialme et empire ;
Molt bon chevalier furent et de molt bone vie .
Ci defenit la geste,la chançons est faillie
De Landri,de Coloigne et de ma dame Olive
Et del roi Alixandre,qui tenoit tout l’empire
De[vers] Constantin[oble],et de sa belle fille [ fol. 172 ]
Et du bon roi Pepin,qui France out en baillie,
Et des maus traïtors Hauquetant et T[o]mile,
2 Forbin et Malquerant,Loqueste et Malingre,
Que Landris ocist tous a l’espée forbie .
Cil Diex qui maint en haut si doint durable vie
Cex qui de bon cuer ont ceste chançon oïe !
Plus ne vous en dirai,querez qui plus en die .
Explicit li romans de Doon
l’Alemant qui fut de la Roche .
Doon de la Roche
Geste
Doon de la Roche: Numérisation de l'édition de P.Meyer et G. Huet de 1921 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Paul Meyer , Gédéon Huet , Doon de la Roche: Chanson de geste E. Champion Paris 1921 Société des anciens textes français (65) Paris