Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. Et vos vos faites garnir et aprester

  2. Qant vos orroiz mon olifant soner

  3. Et les paiens entor moi asenbler

  4. Secorez moi tantost sanz demorer

  5. Ja n avez vos que ce tertre a passer

  6. Et cil responent Bien fet a creanter

  7. Qui vos faudra Dex le puist craventer

  8. A ces paroles s en est li cuens tornez

  9. Sor son destrier fervestuz et armez

  10. Dex le conduie qui an croiz fu penez

  11. Passe le tertre si est en l ost entrez

  12. Voit le pomel dont li aigle ert dorez

  13. Partant conut que c ert li mestre trez

  14. Sor son destrier i vint tot abrivez

  15. L amirant trueve et iij .rois coronnez

  16. N i avoit plus Sarrazin ne Escler

  17. La conseilloient entr eus por deviser

  18. Com il porroient la cite conquester

  19. Au feu grezois esprendre et alumer

  20. Mes en pou d eure changera lor penser

  21. Es vos le conte qui est dedanz entrez

  22. Porte l espie qui est gros et carre

  23. Et par devant estoit li fers tornez

  24. Li troi roi saillent chascuns fu effreez

  25. Dist Aymeris Gloton car vos seez

  26. Mieuz vos ira espoir que ne pensez

  27. Ou pis espoir se ne voz i gardez

  28. Car ne vos veil de riens aseurer

  29. Mesagiers sui ja nel vos quier celer

  30. Au meillor roi dont nus oist parler

  31. C est Charlemaine li gentis et li ber

  32. Cil si m envoie son mesage conter

  33. A l amirant que por fol puis clamer

  34. Qant il osa sor nos a ost torner

  35. Si vieng a lui enquerre et demander

  36. S avant ira ou ci vodra ester

  37. Li quieus est ce fetes le moi mostrer

  38. Li amiranz respont sanz demorer

  39. Sire vasax ja ne m i quier celer

  40. Je sui li sire a cui volez parler

  41. Par Mahomet que ge doi aorer

  42. Bien vos poez por fol musart prover

  43. Qui toz armez osastes ci entrer

  44. Et li portiers le doit bien conparer

  45. Qant vos lessa le suel ainsi passer

  46. Si fera il ne l en puet nus garder

  47. Que ne li face ou pie ou pong coper

  48. Ou de la teste endeus les euz crever

  49. Dist Aymeris De folie oi parler

  50. De biau respondre ne savez apanser

  51. Mes se des autres puet son cors delivrer

  52. D androit de vos le cuit bien aquiter

  53. Je vos deffi nel vos quier plus celer

  54. De Damedeu qui tot a a sauver

  55. Brandist l espie o le fer d acier cler

  56. Fiert l amirant quanqu il pot enteser

  57. Par mi le cors li fist le fer passer

  58. Del faudestuel le fet mort craventer

  59. Qant Sarrazin l ont veu jus verser

  60. Et a la terre morir et janbeter

  61. En fuie tornent sanz plus de demorer

  62. Et li troi roi se cuident destorner

  63. Mes Aymeris lor fu a l ancontrer

  64. Au branc d acier lor fet les chies voler

  65. Del tref se prent par force a retorner

  66. Paien le voient n i ot qu espoenter

  67. IIc .ensengnes i oissiez crier

  68. Dont s estormissent Sarrazin et Escler

  69. Le conte vont si fort avironner

  70. Que de nul sans ne s en pot eschaper

  71. Voit l Aymeris le sans cuide desver

  72. Il trait l espee dont li brans luisoit cler

  73. Cui il consiut son tans li fait finer

  74. Car il n avoient loisir d eus adober

  75. Desarme furent si ne porent durer

  76. C a chascun cop n en face .j .mort giter

  77. Lors fait li cuens son olifant soner

  78. Par .iiij .enpaintes molt hautement et cler

  79. Que bien l entandent si baron et si per

  80. Que il ot fet lez le mont arester

  81. Adonc desrengent sanz plus de demorer

  82. Qui ainz qui mieuz pansent d esperonner

  83. Et le grant tertre molt tost a devaler

  84. En l ost se fierent hardi comme sengler

  85. Monjoie escrient qant vint a l asenbler

  86. Adonc cuidierent Sarrazin et Escler

  87. Que ce fust Charles qui tant fet a douter

  88. Qui ait de France fet son ost amener

  89. Plus le redoutent que home de ca mer

  90. Ne s erent pas encores fet armer

  91. Ce fist Lonbarz hardement recovrer

  92. As brans d acier lor vont granz cox doner

  93. De ci au conte les ont fet reuser

  94. Mes Sarrazin que Dex puist craventer

  95. Li ont ja fet son destrier mort giter

  96. Si li levoient le pan de l auberc cler

  97. Par mi le cors li voloient bouter

  98. Lor granz espiez por li fere finer

  99. Qanz Fouquerez et Jeufroiz de Valcler

  100. Et cil Fouquins dont m oistes parler