Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. Or redevons ci d Aymeri chanter

  2. Qui en l angarde fu au matin montez

  3. Sor son destrier fervestuz et armez

  4. Et regarda devers Nerbone es prez

  5. Tenduz i voit .m .loges et .m .tres

  6. Et .m .aucubes et .m .brehans levez

  7. Voit les cuisines et les feus alumez

  8. Les Sarrazins et venir et aler

  9. Et l un a l autre escremir et joer

  10. Ces chevax ferrent et moinent abuvrer

  11. De Damedeu qui le mont volt sauver

  12. Les maudit toz li cuens gentis et ber

  13. Paienne gent Dex vos puist craventer

  14. Mal soit des meres qui tant en ont porte

  15. Puis des glotons qui les ont engendrez

  16. Je ne cuidasse que outre la grant mer

  17. L une moitie en poist l en trover

  18. Uns autres hom en fust molt effreez

  19. Et il en prist forment Deu a loer

  20. Voirs Dex fet il toi puisse aorer

  21. Qui nos as fet tel avoir amener

  22. Com cist paien ont ci fet amasser

  23. Se Dex ce done qui tot a a sauver

  24. Que ge le puisse avoir et conquester

  25. N iere mes povres tant com puisse durer

  26. Par cel apostre que l en doit aorer

  27. Se Dex me done ma moillier espouser

  28. De cel avoir qui la est asenble

  29. Ferai mes noces en ce domaine tref

  30. Ja en chastel ne m irai osteler

  31. Por noces fere ne por joie mener

  32. Jus de l angarde s en prist a devaler

  33. Jusq a ses homes ne se vost arester

  34. Contre lui vont si baron et si per

  35. Qui des paiens pristrent a demander

  36. Seignor baron dist Aymeris li ber

  37. Puis que Dex vost le suen peuple former

  38. Et en la Virge se dengna aonbrer

  39. Qant vint an terre por le monde sauver

  40. Ne furent tant de paiens ne d Esclers

  41. Com en puet ci sor ce tertre esgarder

  42. Franc chevalier ne vos espoentez

  43. Car s avient chose que doions asenbler

  44. Criez Monjoie et del ferir pansez

  45. Si cuideront Sarrazin et Escler

  46. Que ce soit Charles li forz rois coronnez

  47. Qui ait de France ses barons amenez

  48. Plus le redoutent que foudre ne orez

  49. Se ces premiers avons desbaretez

  50. Li remenanz porroit petit durer

  51. Toz li gaeinz vos soit abandonez

  52. Ja n en prendrai ij .deniers monneez

  53. Tuit en seront et conpangnon et per

  54. Qui de cest jor porra vis eschaper

  55. A toz jorz mes sera riches clamez

  56. Bien sot li cuens ses gens reconforter

  57. Car si les a bien fet aseurer

  58. Que il vodroient ja estre a l asenbler

  59. Lonbart l entendent si pristrent a trenbler

  60. Dist l un a l autre Ne poons eschaper

  61. Hui nos covient nostre tens afiner

  62. Rois Boniface qui ca nos fist torner

  63. Ne se pooit mieuz de nos delivrer

  64. Or puet noz fames richement marier

  65. Et noz granz terres a autre home doner

  66. James .j .seul n en verra retorner

  67. Qant Aymeris les ot si dementer

  68. Les suens barons en prist a apeler

  69. Seignor fet il ne vos quier a celer

  70. Ces Lonbarz ci voi molt espoenter

  71. Mes d une chose me puis bien ramenbrer

  72. Que Boniface me fist bien commander

  73. Qant de lui dui partir et desevrer

  74. Que se venoie a bataille asenbler

  75. El front devant les meisse chapler

  76. Si veil c avant les facons toz aler

  77. Et qant vendrons as ruistes cox doner

  78. Se les veez foir ne reculer

  79. Proier vos veil a toz et commender

  80. C a voz espees les alez decoper

  81. Ja autre Turc n i querez n autre Escler

  82. Qant Lonbart oent le conte ainsi parler

  83. Dist l un a l autre N i poons plus durer

  84. Par mi la mort nos covient a passer

  85. Encore ancui n en poons eschaper

  86. Mes Damedex puist celui vergonder

  87. Qui se lera ocirre et decoper

  88. Si l avra fet as paiens conparer

  89. Tel hardement prenent a recovrer

  90. Que toz les autres en puet en mieuz amer

  91. Seignor baron dist Aymeris li ber

  92. G irai avant le premier cop doner

  93. Sor mon destrier fervestuz et armez

  94. Ja n i menrai ne conpangon ne per

  95. S a l amirant pooie ja parler

  96. Que a delivre le poisse trouver

  97. C est bon espie qui si est d acier cler

  98. Li cuit ge fere par mi le corps passer

  99. Se lor seignor pooie mort giter

  100. Petit porroit li remenanz durer