Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. A mon talant en prendrai venjoison

  2. Et si me plest s en avrai raencon

  3. Hugues l entant si dolanz ne fu hom

  4. Le destrier broche ne dist ne o ne non

  5. Et l Alement revint a esperon

  6. Sor son escu fiert le vasal Hugon

  7. Brise sa lance s en volent li troncon

  8. Et Hugues fiert le traitor felon

  9. Desus la targe .j .tel cop a bandon

  10. Que ne li vaut la monte d un bouton

  11. Et tresperca le hauberc fremillon

  12. Mes li porpoinz fu desoz d auqueton

  13. Qui de la mort garanti le gloton

  14. Li ber l enpaint par grant airoison

  15. Janbes levees l abati el sablon

  16. Puis tret l espee qui li pant au giron

  17. Sore li cort iriez comme lion

  18. Ja li tranchast le chief soz le menton

  19. Mes au rescorre vindrent .c .conpangnon

  20. De la mesniee a l encrieme felon

  21. Ha Godehelpe escrient a haut ton

  22. Si l ont enclos entor et environ

  23. De totes parz asaillent le baron

  24. Se Dex n en pense par son saintisme non

  25. Ja n avra mes secors ne garison

  26. Car cil li lancent lor espiez a bandon

  27. Si li ocient son destrier arragon

  28. Si le metent par terre

  1. Qant Hugues voit soz lui mort son destrier

  2. Savoir poez n ot en lui c airier

  3. Il saut en piez a guise d omme fier

  4. Qui li veist son escu enbracier

  5. Et escremir del branc forbi d acier

  6. Molt le deust aloser et proisier

  7. Tant fiert li ber et devant et derrier

  8. Mal soit de cel qui l osast aproismier

  9. De loinz li lancent les roiz espiez d acier

  10. Ocis l eussent sanz autre recovrier

  11. Qant i apongnent li nobile guerrier

  12. Si conpangnon qui estoient arrier

  13. Et avec aus tuit li .x .escuier

  14. Qui arme furent si comme chevalier

  15. Entre Alemenz se fierent sanz targier

  16. La ou il virent le baron chaploier

  17. Qui molt avoit d aide grant mestier

  18. Nerbone pristrent hautement a huchier

  19. Chascuns celui qu il encontra premier

  20. Fet maintenant a terre trebuchier

  21. Qui lors veist Alemenz desrangier

  22. Tote la place lor ont fet si vuidier

  23. Qu il n i remest fors Hugon le guerrier

  24. Qui a pie fu el pong le branc d acier

  25. Dolent en furent li noble princier

  26. Devant eus gardent s ont veu le destrier

  27. Dont Hugues fist Savari trebuchier

  28. N avoit encor loisir ne recovrier

  29. Que il peust metre pie en estrier

  30. Monter font Hugue li baron droiturier

  31. Isnelement sor l auferrant corsier

  32. N avoit meillor de ci a Monpellier

  33. Si le soloit Savaris avoir chier

  34. Qu il nel donast por les membres tranchier

  35. Et d autre part li felon pautonier

  36. Font Savari lor seignor redrecier

  37. D ilec ou Hugues l avoit fet trebuchier

  38. Si l ot feru tot l ot fet esmaier

  39. Monter le font sor .j .autre destrier

  40. Que devant aus troverent estraier

  41. Il sone .j .grelle por sa gent ralier

  42. Tot entor lui les a fet reperier

  43. Qant il les voit ses prent a aresnier

  44. Seignor dist il molt me doit ennuier

  45. Qant cil vassal me font tel destorbier

  46. Par pou ne m ont fet les menbres froisier

  47. Et a toz jorz de mon cors mehangnier

  48. D autre part ai tel duel de mon destrier

  49. Que j an cuit bien de mon sans enragier

  50. A vos m en clain qui me devez aidier

  51. Se me poez de ces glotons vengier

  52. Tot mon tresor vos ferai si vuidier

  53. N i remendra maaille ne denier

  54. Tant vos donrai et argent et or mier

  55. Com li plus forz en osera chargier

  56. Qant cil l antandent n i ot qu esleescier

  57. Qui les veist de joste apareillier

  58. Envers les contes repansent de brochier

  59. Si les asaillent et devant et derrier

  60. Qant cil le voient n i ot que esmaier

  61. Deu reclamerent le verai jostissier

  62. Qui de mort les desfande

  1. Grans fu et fiers et perillex l estor

  2. De tant de gent ne vit nus hom gregnor

  3. Bien se desfandent li nobile contor

  4. Petit estoient mes molt orent valor

  5. Chascuns tenoit le bon branc de color

  6. N i ot si grant Alemant traitor

  7. S un d aus le fiert sor l iaume paint a flor

  8. Qu il ne l ocie sanz nul autre trestor

  9. Cui chaut de ce trop i a pou des lor

  10. Que trop estoient li cuivert boiseor