Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. A un suen frere qu il avoit el pais

  2. Que il ot bien .c .homes fervestis

  3. Dex gart les contes qui en la croiz fu mis

  4. C or lor croist molt grant poine

  1. Vont s en li mes qui ne se targent mie

  2. Droit vers Nerbone ont lor voie acoillie

  3. .X .escuiers ont en lor conpagnie

  4. Q an destre moinent les destriers de Hongrie

  5. Chascuns ot armes et espee forbie

  6. Qui grant mestier lor orent ainz conplie

  7. Serre chevauchent l anbleure serie

  8. Dex les conduie qui tot a en baillie

  9. Car Savaris a la barbe florie

  10. N a pas son duel encore oublie mie

  11. Le chemin gaite a jornee et demie

  12. Por Hermenjart la bele de Pavie

  13. Dont trop avroit grant duel et grant envie

  14. Se autres hom l avoit en sa baillie

  15. A tot .c .homes cui Damedex maudie

  16. Fu enbuchiez lez une voie antie

  17. Et li baron qui ne s en gardent mie

  18. Vont cele part a mesnie escherie

  19. Hugues parla a la chiere hardie

  20. De Bargelone avoit la seignorie

  21. Seignor dist il ce resenble folie

  22. Qant ne montons es destriers de Surie

  23. Et si fermons les hiaumes de Pavie

  24. Que n aillons pas comme gent esbahie

  25. Car ceste voie me senble molt soutie

  26. Tiengne chascuns pres l espee forbie

  27. Se trovons gent qui nos face asaillie

  28. Chascuns bien se desfande

  1. Seignor dist Hugues franc chevalier baron

  2. Se m en creez sor les destriers monton

  3. Et noz espees pres de nos bien tenon

  4. S an nos assaut tres bien nos desfandon

  5. Et cil responent A Deu beneicon

  6. Chascuns descent del mulet arragon

  7. Es destriers montent sanz plus d arestoison

  8. Puis chevauchierent fierement a bandon

  9. Jusq a l aguet ou firent li glouton

  10. Qant Savaris qui ait maleicon

  11. Choisi les contes si joianz ne fu hom

  12. Dist a ses homes Antandez ma reson

  13. Mien escient ancui gaengneron

  14. Car ci reperent li chevalier baron

  15. Qui l autrier firent si grant ocision

  16. De nostre gent c amene avion

  17. Mes n en i a pas a si grant foison

  18. Ceus qui ci vienent ne pris pas .j .boton

  19. S or n en prenons ancui la venjoison

  20. De ceus qu il ont ocis par mesprison

  21. James nul jor ennore ne seron

  22. Car par eus sont mort nostre conpagnon

  23. Dont j ai le cuer plain de grant marrison

  24. Dient si home Et nos que atendon

  25. Ja contre nos n avront guieres foison

  26. A icest mot s eslessent li gloton

  27. Et vers les contes brochent a esperon

  28. Qant cil les voient molt en ont grant fricon

  29. Seignor ce dist Hugues li gentis hom

  30. De bon conseil ne vient il se bien non

  31. Bien poez ore veoir a ma reson

  32. Que vos donai leal conseil et bon

  33. Car ci nos veinent pongnant de grant randon

  34. Ce m est avis li Alement felon

  35. Que l autre jor desconfit avion

  36. Por amor Deu seignor et por son non

  37. Or gardez bien que chascuns soit preudon

  38. Et conbatant et fier comme lion

  39. Se somes poi tant mieuz les requerron

  40. Vos veez bien qu eschaper ne poon

  41. Ne d autre part nul secors n atendon

  42. Ne nule aide se de Damedeu non

  43. Et bien sachiez se nos desconforton

  44. Ja encontr eus n avrons plus de foison

  45. Ne que l aloe contre l esmerillon

  46. He verai Dex quel soufrete hui avon

  47. Del bon vasal Girart de Rosillon

  48. D Hernaut de Mez et d Ors de Valbeton

  49. Gautier del Mans de Garin de Loon

  50. Et de Geufroi de Hunaut le Breton

  51. De Jocerant et del vasal Guion

  52. Et des .l .que arrieres lesson

  53. S or fussent ci li chevalier baron

  54. Petit durassent envers nos cil gloton

  55. Mes puis que voi que avoir nes poon

  56. Par ce Seignor qui Longis fist pardon

  57. Chier me cuit vendre aincois que pris soion

  58. Ne vos puis fere seignor autre sermon

  59. Toz nos comant a Deu et a son non

  60. Ja i ferrai qui q an poist ne qui non

  61. A ce mot broche le destrier arragon

  62. Et desploia le vermeil confanon

  63. Devant s en vet le tret a un bouzon

  64. De l autre part vint vers lui de randon

  65. Cil Savaris qui li crie a haut ton

  66. Randez vos tost fiz a putain gloton

  67. Ne vos vaudroit la defanse .j .bouton

  68. En Alemagne vos menrai en prison