Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. Parmi ces portes les covendra paser

  2. Car ge vos di tout por voir sanz fauser

  3. Que la cite vodre ge conquester

  4. Ainz que m en aille en France

  1. Naimes entant Charlemaine le roi

  2. Qui ses barons a mis en tel effroi

  3. Il li a dit belement en recoi

  4. Sire fet il par Deu merveilles oi

  5. Ne vi mes home plain de si grant desroi

  6. Mes bien sachiez par la foi que vos doi

  7. S avoir volez la cite que ci voi

  8. Onques si chiere n achetastes ce croi

  9. Qu il n a si fort jusqu au val de Martroi

  10. Ne crient asaut perriere ne berefroi

  11. Cil que la tient a leianz avec soi

  12. .XXm Turs qui moinent grant boufoi

  13. Si a chascuns et armes et conroi

  14. Ne doutent siege vaillisant .j .baloi

  15. Et tuit nostre home sont si las par moi foi

  16. Que une fame ne valent pas li troi

  17. N avez baron prince conte ne roi

  18. Qui ait talant d asaut ne de tornoi

  19. N il n ont destrier ne mur ne palefroi

  20. Qui au besong vausist ne ce ne coi

  21. Car n ont mengie fors que fuerre et herboi

  22. Si n avez home nesun si com ge croi

  23. Qui puist porter ne armes ne conroi

  24. Tant ont eu de travail et d ennoi

  25. Droiz enperere ge le di endroit moi

  26. Que ge voudroie estre foi que vos doi

  27. El regne de Baiviere

  1. Quant Charlemaine ot Naimon escoute

  2. De mautalant a tout le sens mue

  3. Si li respont iriez comme sengler

  4. Biaus sire Naimes or n en soit plus parle

  5. Que foi que doi au roi de majeste

  6. Je n enterrai en France le regne

  7. Jusque je aie conquise la cite

  8. Alez vos en se il vos vient a gre

  9. Mes par la foi que doi saint Ennore

  10. Qui que s en aut sachiez je remendre

  11. Sire dist Naimes merci por amor De

  12. Aiez pitie de ce vostre barne

  13. Que tant avez traveillie et pene

  14. Leissiez biaus sire ester ceste cite

  15. Ja ne l avroiz nul jor de vostre ae

  16. Se Dex n i fait vertuz par sa bonte

  17. Si vos dirai de ce la verite

  18. Paien vos ont de sans contrepase

  19. Lor chemin ont desoz terre cheve

  20. Molt tost s en sont par ileques ale

  21. En Sarragoce se il lor vient a gre

  22. Et a Tolose ont lor chemin ferre

  23. Et a Orenge qui tant a de fierte

  24. Dont tost avroient le secors amene

  25. S aviez ore asise la cite

  26. Charles l antant tout a le sans mue

  27. Naimon apele si li a demende

  28. Biaus sire Naimes com a non la cite

  29. Sire fet il ja ne vos ert cele

  30. Nerbone a non c est fine verite

  31. Car ge l ai bien enquis et demende

  32. N a en cest mont si riche fermete

  33. Plus de .xx .toises ont li fose de le

  34. Et autretant sont en parfont cheve

  35. Li floz de mer cort parmi le fosse

  36. Aude la grant sachiez de verite

  37. A tot entor le mur avironne

  38. Par ilec vienent li grant dromont ferre

  39. Et les galies plaines de richete

  40. Dont cil sont riche de la bone cite

  41. Qant de la porte ont le clavel ferme

  42. Et li portiers a sus le pont leve

  43. Lors puent estre tres bien aseure

  44. Qu il ne redoutent home de mere ne

  45. Ne les prandroit toute crestiente

  46. Charles l antant s en a un ris gite

  47. He Dex aie com est bien encontre

  48. Ce dist li rois au coraje adure

  49. Est ce Nerbone dont l en m a tant conte

  50. Qui toute Espangne sormonte de fierte

  51. Qant oi pris Nobles et retenu Forre

  52. Lors mist ses gardes en iceste cite

  53. Que il la dut garder a sauvete

  54. Sire dist Naimes par foi c est verite

  55. Mes Sarrazin n orent pas oublie

  56. Puis que il virent Rollant de ci torne

  57. Si s asenblerent li cuvert deffae

  58. Si rasaillirent ceste grant fermete

  59. Et si l asistrent environ de tot le

  60. Mainte perriere i orent amene

  61. Tant asaillirent li gloton parjure

  62. Q an mains d un mois sessirent la cite

  63. Si furent tuit cil dedanz desmenbre

  64. Or ont puis tant paien fait et ouvre

  65. Que refait ont les murs qu erent casse

  66. Et tot entor li fose repare

  67. Aparfondi sont molt et releve

  68. Charles l entant tot a le sens mue

  69. Naimes dist il qui tient la fermete