Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. Mainte miracle li fist Dex en sa vie

  2. Qant en Espangne ala en ost banie

  3. O il mena si grant chevalerie

  4. Et tant de gent conbatant et hardi

  5. Prise ot Barbastre et Nobles ot sessi

  6. Et ot conquise la cite de Lerie

  7. Bien eust lors sa besongne fornie

  8. Tote la terre fust en sa conmendie

  9. De tote Espangne et de tote Persie

  10. Eust il lors tote la seignorie

  11. Se ne fust Ganes qui par tel felonnie

  12. Vandi Rollant a la chiere hardie

  13. Et Olivier et l autre conpangnie

  14. Q an Rancevax furent mort par envie

  15. Qant le sot Charles a la barbe florie

  16. Tel duel en ot que n est hom qui le die

  17. Mes apres ce .iij .jorz ne tarja mie

  18. Que il vencha sa riche baronnie

  19. Car sus Marsile asenbla s ost banie

  20. S ocistrent tant de la gent paiennie

  21. Coverte en fu plus de liue et demie

  22. Toute la voie et la place vestie

  23. Si en chacierent par molt fiere aatie

  24. Marsilion et sa gent maleie

  25. Puis revint Charles vers France la garnie

  26. Iriez et tristes de ce ne doutez mie

  27. Francois reperent chascuns molt se gramie

  28. Bien senblent gent qui molt soit traveillie

  29. Charles chevauche derriers sa conpangnie

  30. Desoz lui ot .j .mulet de Sulie

  31. Des .xij .pers fet chiere molt marrie

  32. Et por lor ames Jesu Crist forment prie

  33. Que il les mete en pardurable vie

  34. Biaus nies dist il vostre ame soit garie

  35. En paradis coronnee et florie

  36. Que dirai ore en France la garnie

  37. A Saint Denis en la mestre abaie

  38. La troverai la grant chevalerie

  39. Demanderont de la grant baronnie

  40. Que en Espangne menai par aatie

  41. Que dirai ge dame sainte Marie

  42. Fors q an Espangne est morte et enfoie

  43. Sire dist Naimes ne dites tel folie

  44. Le duel que faites ne vos valt une alie

  45. Mort sont li conte nes recoverroiz mie

  46. Ce a fait Ganes que li cors maudie

  47. Voire dist Charles bien a France honnie

  48. .IIIIc .anz et plus apres ma vie

  49. De la venchance sera chancon oie

  50. Atant le lessent s ont lor voie acoillie

  51. Charles et sa conpangne

  1. Granz fu li duels que vos m oez conter

  2. Que demenoient li baron et li per

  3. A tant de gent com il pot ramener

  4. S en reperoit Charlemaine li ber

  5. Nostre emperere a un pui devaler

  6. Si com il dut .j .haut tertre monter

  7. Par devers destre se prist a regarder

  8. Entre .ij .roches pres d un regort de mer

  9. Desus un pui vit une vile ester

  10. Que Sarrazin i orent fet fermer

  11. Molt bien fu close de mur et de piler

  12. Onques plus fort ne vit hom conpasser

  13. Virent l arbroie contre le vent brenler

  14. D is et d aubors q an i ot fet planter

  15. Plus biau deduit ne pot nus regarder

  16. .XX .tors i ot fetes de liois cler

  17. Et une en mi qui molt fist a loer

  18. N a home el mont tant sache deviser

  19. N i covenist .j .jor d este user

  20. S il voloit bien tote l uevre aconter

  21. Que paien firent en cele tor fonder

  22. Les creniax firent tout a plon sceler

  23. Jusqu as batailles ot .j .ars que giter

  24. Sus as estages del pales principer

  25. Ot .j .pomel de fin or d outremer

  26. Un escharbocle i orent fet fermer

  27. Qui flanbeoit et reluisoit molt cler

  28. Com li solauz qui au main doit lever

  29. Par nuit oscure sanz menconge conter

  30. De .iiij .liues le puet en esgarder

  31. Dautre part est la greve de la mer

  32. D autre part Aude qui molt puet raviner

  33. Qui lor amoine qanqu il sevent penser

  34. A granz dromonz qui la font arriver

  35. Font marcheant les granz avoirs porter

  36. Dont la cite font si bien rasazer

  37. Que riens n i faut q an sache deviser

  38. Qui mestier ait a cors d ome ennorer

  39. La cite prent li rois a esgarder

  40. Dedanz son cuer forment a goloser

  41. Son dru Naimon en prist a apeler

  42. Biaus sire Naimes ce dist Charles li ber

  43. Dites moi tost nel me devez celer

  44. Qui est tel vile qui tant fet a loer

  45. Cil qui la tient se puet tres bien vanter

  46. Q an tot le mont ce cuit je n a sa per

  47. Ne crient voisin qui le puise grever

  48. Mes par l apostre que l en doit aorer

  49. Cil qui en France s en vodront retorner