Reine Sebile

Geste

Reine Sebile: Fragment Loveday - Texte fondé sur l'édition Baker , éd. par A.T. Baker, compléments de Mario Roques transcription revue par Louis Brandin édition numérique Pauline Lévêque sous la direction de Jean-Baptiste Camps , , éd. par A.T. Baker , Mario Roques , Nouveaux fragments de la chanson de la Reine Sibille 10.3406/roma.1915.4823 Romania 1915 44 p. 1-13

  1. E le roy lour ottroie volunters e de gré,
  2. verso Quant ost le jugement que ert de loiauté .
  3. Quant Macer l''oï grant joi en ad mené,
  4. Son grant mordre quida bien aver aquité ;
  5. Mes Deu qu''onques ne menti bien sout la vérité .
  1. Ceo fu par un matin que le solail lust gent ;
  2. Macer ount amené esquier e serjaunt,
  3. Devaunt le roi s''en vint .Charles lui ad dist taunt :
  4. «Macer,dist le Roy,entendez mon semblaunt .
  5. Certes jeo vous aim mout,ne seez mie mescreaunt,
  6. Por l''amor du lignage que vous avez si grant ;
  7. Mes il m''estuit dreit faire a ma court de ma gent .
  8. Jugé ount,ceo me semble,mi amis meuz vallaunt .
  9. Pur que Aubri n''ad home,estrange ne parent,
  10. Que voille vers vous combatre el chaump present,
  11. Cest chen vers vous en ad mout grant talent,
  12. Vous estoit combatre par itele covenaunt :
  13. Vous averez un escu round e un baston pesaunt
  14. E un baston d''espine bien fait e avenaunt1
  15. Si le chen poez ventre ne faire recréant .
  16. Tout quite serras de la traïson graunt,
  17. Ceo que vous mettent sus mi home e ma gent
  18. De Aubri que est occis dont j''ai le quer dolent .
  19. E si le chen vous vaint,jeo di par saint Amenaunt,
  20. Jeo vous ferai justice tel cum est covenaunt
  21. D 'escorcher e d''ardoir,d''encroier au vent2 .
  22. —Sire,ceo dist Macer,Deu en trais a guaraunt
  23. Que Aubri ne fis mal plus que mon cher enfaunt .«
  1. «Sire,ceo dist Macer,por Deu le fiz Marie,
  2. Ja en serrai ceo honte e molt grant vilanie
  3. Si me combat e au chen en bataille formie .
  4. —Neni,ceo dist li Roi,car issi l''ount jugie
  5. Mi home e ma gent dount il i ad partie .
  6. Alez adober e si ne demorés mie .»
  7. Macer s''en torna,si apele sa lignie ;
  8. Si parent l''adoberent en la sale voutie :
  9. Un court baston d''espine lui ount mis en baillie .
  • 1. La fin du vers est de lecture difficile à cause du pli.
  • 2. vers ajouté en marge.