«Haim de Bordele et le preu Hardoïn .
Maugré en aient tretuit li Poitevin
Et le parage Fromont le posteïf,
Sil donrai je le cheva Fromondin .
Se jele puis en grant estor veïr,
Si le donré je mon neveu Rigaudin .»
Dist li mesages :«Je vos ai bien oï .
Si m ‘aïst Dieus,il li sera bien dit .»
François s ‘en rient,Breton et Engevin :
Tieus est bleciez et en son lit se gist
Qui jure Dieu,qui onques ne menti,
Que il ira au tornoi le matin !
Et li mesages arrieres s ‘en revint,
Parmi la porte en la vile se mist,
Juqu ‘en la sale ne prist il onques fin,
Trouva Fromont seant en .I .jardin .
Cil chevalier furent environ environ li .
Ça .X .,ça .XX .,ça .LX .,ça .VI .,
Por le mesage escouter et oir .
Fromonz le voit,si l ‘a a reson mis :
«Diva !fet il,que me mande Pepins ?
Avromes nus le tornoi le matin ?»
Et cil respont :«Si m ‘aïst Dieus,oïl ;
Mes par lo roi eüssiez vos failli,
Se ne fust Begues qui desus li le prist :
Ilecques vit —I —demoisel venir,
Rigaut a nom,filz le vilain Hervi ;
Ainz de mes elz si fier home ne vi,
Entre —II —elz bien plaine paume a il .
Begues li dus l ‘apela son cousin ;
Ne s ‘en cela,oiant tretoz le dist,
Qu ‘il li donroit le cheval Fromondin .
—Fil a putain !li quens Bernarz a dit,
Fol mesagier,Dieus te puit maleïr,
Qui si fez moz nus a contez et diz !»
Et dit li mes :«Encore ai plus oï :
Maugré Fromont,que je voi sooir ci,
Et maugré vos qui tant iestes hardi,
Et vo parage,quan qu ‘il en a iqui,
Se l ‘avïez et juré et plévi,
Si avra il le cheval Fromondin,
Si le donra son neveu Rigaudin .
—Certes il ment,li quens Bernarz a dit,
Je cuit le suen li convenra guerpir .
—Or soiez prest quoi,li quens Fromonz a dit,
Mau quenoissiez duc Begon de Belin ;
Il l ‘avra tost,certes,puis qu ‘il l ‘a dit ;
Ainz de mes elz tel chevalier ne vi,
Si fier as armes,ne si amenevi .
Alez veillier,Fromondins,sire filz,
En l ‘onor Dieu qui en la croiz fu mis,
Qui vus deffende de mort et de peril .»
Et li vallez s ‘en vet a Saint—Seurin,
En sa compaingne de chevaliers .VII .M .;
La nuit veilla,grant luminaire fist .
Li rois de France enmi les champs en vint,
En sa compaingne maint chevalier gentil .
Et dist li rois :«Por Dieu,entendez mi s:
Ainz puis que Begues de moi se departi,
Ne poi en l ‘ost reposer ne dormir,
Que je ne fusse nuit et jor estormiz ;
D ‘eschaugueter,por Dieu,qu ‘en sera il ?
—Je la feré,dist Begues de Belin,
Par tel convant com vos porroiz oïr :
Seürement porroiz en l ‘ost dormir,
Et s ‘en i pert vaillant .I .angevin,
Que je en rende .II .auferranz de pris .»
Il en apele Huon de Cambroisi,
De Luceborc Galeran et Gaudin,
Si apela le Borgoing Auberi :
«Prenez vos armes,franc chevalier,dist il ;
Et il responnent :—Tout a vostre plesir .»
De l ‘ost s ‘en issent de chevaliers .II .M .
Aus .IIII .portes a ses aguez bastiz,
Et a chascune ot .V .C .fervestiz .
Bien gart Fromont et sa gent de l ‘issir .
Li jorz s ‘en va et la nuit aseri .
Les guetes cornent desus le mur entif .
Fromonz se sist sus le pont torneïz,
Ses genz devise,si a son guet asis .
Bernart apele,le segneur de Nesil :
«Issiez vos en,biaus oncles,Fromonz dist,
Juqu ‘aus herberges les alez envaïr .
Qui en geu entre,et geu doit consentir,
Et l ‘en doit bien grever son anemi .»
Et dist Bernarz :«Sire,vostre merci .»
Aus hostieus viennent,si furent tost garni ;
Juqu ‘a la porte ne pristrent onques fin ;
Issir vouloient comme l ‘espie vint .
En son venir,lor a noncié et dit
Que Begues guete a .II .M .fervestiz .
Et dist Fromonz :«Je ne lou pas l ‘issir ».
Arrieres vint dant Bernart de Nesil
Dist Fromonz :«Oncles,or vos poëz dormir,
Puis serez fres por aidier Fromondin .»
La nuit s ‘en va et l ‘ajornee vint .
Et Fromondins par matin messe oï,
Si s ‘en retorne,a son hostel en vint .
Il a mengié et beü .I .petit ;
Si se coucha et dormi en .I .lit .