Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. Et li vasauz fu sage et bien apris

  2. Qant vit le roi ne fu mie esbahiz

  3. Ainz que li rois l eust a reson mis

  4. Le salua gentement Aymeris

  5. Cil Damedex qui maint en paradis

  6. Il saut et gart le roi de Saint Denis

  7. Et toz ses homes si com ges voi assis

  8. Et il confonde ses mortieus enemis

  9. Entandez moi enperere gentis

  10. Otroiez moi Nerbone et le pais

  11. Ce dont n a cure ne prince ne marchis

  12. Tant fort redotent paiens et Arrabis

  13. Donez la moi enperere gentis

  14. Girars l entant s en a gite .j .ris

  15. Puis respondi l enperere au fier vis

  16. Por les sainz Deu est ce dont Aymeris

  17. Aymeriet por le cors saint Denis

  18. Vodras tu estre des ore mes amis

  19. Ne te menbre il de l eure ne des dis

  20. Qant en Vienne estoit Girars assis

  21. En la forest avoie le porc pris

  22. La me sorprist dans Girars li marchis

  23. Et tu meismes armez o lui venis

  24. Tant fus vers moi fiers et mautalentis

  25. S il te creust n en eschapase vis

  26. Ne remest pas en toi ne fui ocis

  27. Foi que doi vos sire dist Aymeris

  28. De tel cuer sui et esterai toz dis

  29. Ja n amerai nul jor mes ennemis

  30. Mes bien savez trop aviez mespris

  31. Qant a mon oncle toliez son pais

  32. Foi que doi vos enperere au fier vis

  33. Tant com vodroiz je serai vostre amis

  34. Et qant vodroiz par le cors saint Denis

  35. Je reserai de vostre amor eschis

  36. De terre n ai vaillant .ij .parisis

  37. Qant Deu plera le roi de paradis

  38. Je ravrai tost plus grant avoir conquis

  39. Voir dist li rois molt ies preuz et gentis

  40. En l annor Deu qui en la croiz fu mis

  41. Te dong Nerbone et trestot le pais

  42. Par tel covant la pranz biax douz amis

  43. Que Damedex qui pardon fist Longis

  44. Te doint vitoire contre tes ennemis

  45. Dex vos en oie sire dist Aymeris

  46. Qui me croise barnaje

  1. Dist l enperere Ore esta gentement

  2. De mon duel ai molt grant alegement

  3. Puis q Aymeris tendra le chasement

  4. De Nerbonois et l annor qui apant

  5. Je croi molt bien de fi veraiement

  6. Q an mal en sont entre paienne gent

  7. Aymeri frere molt as grant hardement

  8. Mes de l avoir n as tu mie granment

  9. Avoir covient plante d or et d argent

  10. Fain et avoinne char et vin et froment

  11. Et maint destrier et maint bon garnement

  12. Qui veut tenir si riche chasement

  13. Comme au seignor cui Nerbonois apant

  14. Dex aidiez sire com m esmaiez forment

  15. Dist Aymeris par le cors saint Climent

  16. N est encor Dex la sus el firmament

  17. Qui est puisanz toz jorz sanz finement

  18. Je croi en lui molt bien veraiement

  19. Qu il m aidera ce cuit prochienement

  20. Je sui encore bachelers de jovant

  21. Si m eist Dex qui ne faut ne ne ment

  22. Se de l avoir ont la paienne gent

  23. Nos en avrons par le mien escient

  24. Qant Charlemaine cele parole entant

  25. Molt par en ot grant joie

  1. Aymeri frere dist Charles au vis fier

  2. Gentis hom sire ne vos chaut d esmaier

  3. Ne vos faudre tant com vos puise aidier

  4. Eincois q an France m en doie reperier

  5. Mil chevaliers ferai o vos lessier

  6. S avra chascuns et armes et destrier

  7. Aideront vos qant en avroiz mestier

  8. As Sarrazins mater et jostissier

  9. Se vos poez sor paiens gaengnier

  10. Terre ou avoir ou argent ou or mier

  11. N en quier avoir vaillisant .j .denier

  12. Granz merciz sire dist Aymeri le fier

  13. Ja se Deu plest le verai jostissier

  14. N orroiz de nos mauves plet renoncier

  15. Au pie le roi se vait agenoillier

  16. Qant l en redrece l enperere au vis fier

  17. Et li a dit oiant maint chevalier

  18. Aymeris sire ja nel vos quier noier

  19. Des or vos veil amer et tenir chier

  20. Seignor dist Charles franc nobile guerrier

  21. Or m entendez Francois et Berruier

  22. Le mien panse ne vos doi pas noier

  23. Molt a grant tans ne me poi leescier

  24. Puis que perdi Rollant et Olivier

  25. Et les barons qui me suelent aidier

  26. Ne poi a joie ne boivre ne mengier

  27. Savez por coi jeu di franc chevalier

  28. Vez Aymeri qui tant fet a proisier

  29. Ce que geu sant a si noble guerrier