Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. Sire fu de la terre

  1. Li siemes fiz Hermenjart au cuer fin

  2. Et Aymeri le conte palazin

  3. Si apelerent le menor Guibelin

  4. Molt ot franc cuer et coraje enterin

  5. S orent en lui paien felon voisin

  6. Maint en ocist a son branc acerin

  7. Mes a un jor le pristrent Sarrazin

  8. En croix le mistrent li cuvert barbarin

  9. Molt grant martire fesoient del meschin

  10. Qant le rescout son pere et son cousin

  11. Puis li dona Aymeris en la fin

  12. Tot son pais et son pales marbrin

  13. Si fu oirs de Nerbone

  1. Entre ces freres si ot v .serors nees

  2. Plus furent beles que sereinnes ne fees

  3. Qant bien norries les ot et alevees

  4. Cuens Aymeris qui chier les ot gardees

  5. A riches princes dont molt furent amees

  6. Les a li cuens richement mariees

  7. Tant les ot Dex par sa grace amendees

  8. Et essauciees et a ennor montees

  9. De maintes terres furent dames clamees

  10. Par eus crut li lingnajes

  1. L ainee fille donerent a moillier

  2. A un baron qui molt fist a proisier

  3. Cil ot a non Dreues de Mondidier

  4. IIII .fiz orent qui furent preu et fier

  5. L un fu Gaudins et li autres Richier

  6. Et li dui autre Sanson et Angelier

  7. Qui tant aiderent Guillaume le guerrier

  8. Crestiente firent molt essaucier

  9. Forment les dut Guillaumes avoir chier

  10. Neveu furent au conte

  1. L autre donerent a j .baron vaillant

  2. Raoul del Mans a l adure talant

  3. Icil si orent .j .molt gentil enfant

  4. Qu il apelerent Anquetin le Normant

  5. Molt ot en lui ce sevent li auqant

  6. Hardi vasal et fier et conbatant

  7. Sa grant proesce fu bien aparissant

  8. Envers paiens que il guerroia tant

  9. Maint en ocist a l espee tranchant

  10. Ainz nes ama nul jor de son vivant

  11. Molt bien aida Guillaume le puissant

  12. Et au riche lingnaje

  1. La tierce fille donent a un marchis

  2. Qui d Angleterre fu hauz hom et de pris

  3. Et puis fu sains ce dient el pais

  4. Et deservi la joie en paradis

  5. Mes aincois orent .v .enfanz molt gentis

  6. L un fu Rabiaus li autres Estormis

  7. Li tierz Mularz qui fu fiers et hardiz

  8. Li carz si fu Soef del Planteiz

  9. Et sains Morans fu li quinz ce m est vis

  10. Oi avez que molt fu Deu amis

  11. A Doai gist li bons cors sainz de pris

  12. Molt ot sainz el lingnaje

  1. La carte fille Hermenjart de Pavie

  2. Donent Huon a la chiere hardie

  3. De Floreinville ot cil la seignorie

  4. De celui fu Fouques qui tint Candie

  5. Dont li plusor ont la chancon oie

  6. Qu il la conquist par sa chevalerie

  7. Et Anfelise la bele l eschevie

  8. Toli par force a la gent paienie

  9. Puis l espousa qant sa loi ot guerpie

  10. Et crut en Deu le fil sainte Marie

  11. Cele estoit suer .j .roi d Esclavonie

  12. Ce fu Tibaut a la chiere hardie

  13. Qui guerroia Espangne

  1. La menor fille Aymeri le baron

  2. La plus juennete Blancheflor ot a non

  3. Molt par fu bele et de gente facon

  4. Et sus les autres fu de plus grant renon

  5. Molt li dona Damedex riche don

  6. Qant a moillier la prist li fiz Charlon

  7. Rois Looys qui molt par fu preudon

  8. Et tint la terre a force et a bandon

  9. Et ocist puis tant Sarrazin felon

  10. Bien en avez oie la chancon

  11. Que en bataille ocist le roi Gormont

  12. Cil Looys que nos ci vos dison

  13. Prist Blanchefor a la clere facon

  14. Roine fu de France

  1. Si richement com ge ci vos devis

  2. Si maria ses filles Aymeris

  3. Desor toz contes fu li cuens posteis

  4. Et par le mont plus enforciez d amis

  5. Ses fiz toz .vij .ainsi com ge vos dis

  6. Retint li cuens o lui en son pais

  7. Tant les norri li bons cuens seignoriz

  8. Que tuit .vij .furent damoisel de haut pris

  9. Plus fiers danziax ne vit hom qui soit vis

  10. Plus corageus plus fiers ne plus hardiz

  11. Molt grant mestier lor fu ce m est avis

  12. Car en tel marche fu li cuens Aymeris

  13. C onques n i fu sanz guerre .xv .dis

  14. Tant l asaillirent li Turc et li Persis

  15. Que de la guerre eust sovant le pis