Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. Car bien savez de fine verite

  2. C ainz ne vit nus si grant ost asenble

  3. Se il perdirent lor seignor avoe

  4. Que il ne fussent tantost desbarete

  5. Et qant il virent le franc duc redoute

  6. Girart qui ot tel secors amene

  7. Tout maintenant sont en fuie torne

  8. Que puis n i ot ganchi ne trestorne

  9. Li dus Girarz a tant esperonne

  10. Parmi l estor et venu et ale

  11. Que tot a pie a Aymeri trove

  12. Son chier neveu que il a tant ame

  13. Tant ot feru de son branc acere

  14. Que tuit li braz l en estoient enfle

  15. Et si l avoient paien el cors navre

  16. Li sans li ist par le hauberc safre

  17. Tot l esperon en ot ensanglante

  18. Voit le Girarz pres n a le sans desve

  19. Prent .j .destrier si li a presente

  20. A pie descent si l a aresone

  21. Biaus nies fet il estes vos en sante

  22. Oil biaus oncles la merci Damede

  23. Mes s un petit eussiez plus este

  24. Je sai de voir mal me fust encontre

  25. Or tost biaus oncles n i ait plus demore

  26. Gardez paien ne soient eschape

  27. Or tost apres trop avons sejorne

  28. A ice mot sont andui remonte

  29. Apres paiens ont brochie et hurte

  30. Et tuit lor home apres esperonne

  31. Les .x .barons ont devant eus trove

  32. Que Sarrazin orent enprisone

  33. Toz les liens lor ont molt tost cope

  34. Et cil monterent qant furent delivre

  35. Mes Sarrazin s enfuient aroute

  36. Li dus Girarz les a forment haste

  37. Au dos les siut el pong le branc letre

  38. Sor aus a bien son hardement prove

  39. Cui il consiut tot a son tans fine

  40. De ci au vespre a li enchauz dure

  41. Des paiens morz furent jonchie li pre

  42. Entre les morz sont li vif ostele

  43. Cheoir se lessent ausin comme pasme

  44. Del sanc as morz se sont ensanglante

  45. Que il ne soient perceu n avise

  46. Mal soit de ceus qui soit eschape

  47. Fors Baufume et le roi Desrame

  48. Par tost aler ont le jeu joe

  49. Ensenble o eus .xxx .paien arme

  50. A lor nes vienent si sont dedanz entre

  51. En un chalant s en sont nagent torne

  52. Tout droitement a Cordres

  1. Aymeris a bien l enchaut maintenu

  2. O lui Girarz si ami et si dru

  3. Se il ne fussent a ce besong venu

  4. A Aymeri en fust mal avenu

  5. Tuit fussent mort et pris et confondu

  6. Se il ne fussent a ce point secoru

  7. Il s en repairent qant l estor fu veincu

  8. Aymeris est a son oncle coru

  9. Chascuns d eus oste de son chief l iaume agu

  10. Il s entrebesent qant ont di lor salu

  11. Li dus Girarz qui proz et sages fu

  12. Li dist Biaus nies com vos est avenu

  13. Molt bien biaus oncles merci au roi Jesu

  14. Et vos qui nos avez mestier eu

  15. Vers Sarrazins nos somes conbatu

  16. Tant longuement nos somes desfandu

  17. Que tuit en somes lasse et recreu

  18. Se ne fussiez a itel point venu

  19. Mien escient tuit i fussions veincu

  20. N en eschapast ne juenne ne chenu

  21. Mes a tel point nos avez secoru

  22. Que Deu merci l estor avons veincu

  23. Et si avons grant avoir retenu

  24. Que aporterent li felon mescreu

  25. Dont tieus ert riches qui devant povres fu

  26. Si en sera largement despandu

  27. A feste et a grant joie

  1. Girarz descent en une praierie

  2. Et avec lui sa riche conpangnie

  3. A lor talant ont pris herbergerie

  4. Li dus Girarz de neant ne s oblie

  5. Son neveu dist a la chiere hardie

  6. Aymeris sire nel vos celerai mie

  7. Ce que vos mande dame Guibourc m amie

  8. Par moi vos mande droiz est que le vos die

  9. Ne faites noces dedanz sale voltie

  10. Ne an chastel ne an cite garnie

  11. Qant vos prendroiz Hermenjart de Pavie

  12. Mes en ces tentes par mi la praierie

  13. Et en ces tres a la gent paiennie

  14. Fetes vos noces par molt grant seignorie

  15. Si menez feste et joie resbaudie

  16. Et tel richesce et si grant baronnie

  17. Que jusqu en France soit la novele oie

  18. Charles li rois a la barbe florie

  19. Qui vos lessa ceste terre en baillie

  20. Vos en avra plus chier tote sa vie

  21. Dist Aymeris a la chiere hardie