Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. Gentis cuens sire volez ceste moillier

  2. Respont li cuens Riens plus ne vos requier

  3. Par la main destre li vait li rois baillier

  4. Li cuens la prist liement sanz dengier

  5. Grant joie font li baron chevalier

  6. A lor ostieus alerent herbergier

  7. Jusqu au matin qu il virent esclerier

  8. Lors s apareillent sanz plus de l atargier

  9. Sor ces somiers font ces hernois chargier

  10. Es destriers montent li nobile guerrier

  11. Vait s en li cuens s enmeine sa moillier

  12. De la vile issent sanz plus de delaier

  13. Rois Boniface les ala convoier

  14. Aymeris sire par le cors saint Richier

  15. Entre tiex gens vos en alez arrier

  16. Qui vo lignaje n en orent onques chier

  17. Gentis cuens sire seu volez ostroier

  18. De mes Lonbarz enmenroiz .j .millier

  19. S avra chascuns et armes et destrier

  20. Aideront vos se en avez mestier

  21. Mes d une chose vos veil ge molt proier

  22. Que ce se vient a estor commencier

  23. Que les metoiz devant el chief premier

  24. Dist Aymeris Bien fet a ostroier

  25. De conpangnie ne me doi esmaier

  26. Par saint Denis a cui l en doit proier

  27. Qant plus en ai plus me fet leeschier

  28. Lonbart l entendent n i ot que corrocier

  29. Li uns a l autre le prist a conseillier

  30. Par saint Remi molt nos doit ennuier

  31. Rois Boniface ne nos a guieres chier

  32. Qui a tel home nos veut ici baillier

  33. Plus aime guerre que boivre ne mengier

  34. Se apres lui nos covient chevalchier

  35. Ja uns toz seus n en revendra arrier

  36. Qant Boniface les ot ainsi plaidier

  37. Conte Aymeri en prist a aresnier

  38. Gentis hom sire a celer nel vos quier

  39. Icist Lonbart c o vos veil envoier

  40. Sont molt coart et foible au commencier

  41. Se vos venez au fort estor plenier

  42. El front devant les fetes chevalchier

  43. Si les metez as premiers cox paier

  44. Lors devendront et corageus et fier

  45. Ainz qu il se lessent prendre ne destranchier

  46. Ce sachiez vos se vendront il molt chier

  47. Lonbart l entandent n i ot que esmaier

  48. Dist l un a l autre N i vaut rien gramoier

  49. Se par bien fere ne poons reperier

  50. Honnis soit il a guise de lanier

  51. Qui s i lera tuer ne mehangnier

  52. Tant com il puist durer au branc d acier

  53. Lors se departent li baron chevalier

  54. Vait s en li cuens s enmeine sa moillier

  55. Rois Boniface est retornez arrier

  56. Et Aymeris panse de chevauchier

  57. O lui enmaine son grant barnaje fier

  58. Or les conduie cil qui tout puet jugier

  59. C or croist molt grant paine

  1. Endementiers c alez fu a Pavie

  2. Cuens Aymeris a la chiere hardie

  3. Querre Hermenjart la bele l eschevie

  4. Uns Sarrazins cui li cors Deu maudie

  5. Droit a Orenge a sa voie acoillie

  6. Jusq au pales ne s aseura mie

  7. Desrame trueve en la sale voltie

  8. Et Baufume o lui sa conpangnie

  9. Ce sont li roi qui par la croute antie

  10. Fors de Nerbone issirent la garnie

  11. Qant Charlemaine i mena s ost banie

  12. Cil dui issirent par mi la croute antie

  13. Por aler querre et secors et aie

  14. A l amirant qui sire ert de Persie

  15. En Orenge orent puis pris herbergerie

  16. Enz el palais en est montez l espie

  17. Il les salue de la loi paienie

  18. Baron fet il Mahomez vos aie

  19. Alez s en est Aymeris a Pavie

  20. Querre une fame a grant chevalerie

  21. Si a lessie Nerbone desgarnie

  22. Molt sont dedanz a mesnie escherie

  23. Se vos volez par tans l avroiz sessie

  24. Qant li dui roi ont la novele oie

  25. Molt en firent grant joie

  1. Qant li dui roi oient le mes parler

  2. Que Aymeris est alez querre per

  3. Droit a Pavie ou la doit espouser

  4. D ilec s en tornent n i vodrent plus ester

  5. Vers Babiloine pansent d esperonner

  6. Tant com cheval lor puent randoner

  7. De lor jornees ne vos quier deviser

  8. En Babiloine vindrent .j .avesprer

  9. A pie descendent sanz plus de demorer

  10. Puis en monterent el palais principer

  11. L amirant truevent seant a son souper

  12. Et iiij .rois qui molt font a douter

  13. De l autre enpire ne vos sai ge nomer

  14. Merveille gent i ot fet asenbler

  15. Por une feste que vodrent celebrer

  16. De Mahomet que durent aorer