Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. En son coraje se vet aporpansant

  2. S il li eschape il ne se prise .j .gant

  3. Tant a brochie le destrier auferrant

  4. Que Savari qui s en fuioit devant

  5. A conseu au destroit d un pendant

  6. Il li escrie Cuiverz n iroiz avant

  7. Hui conparroiz vostre traison grant

  8. Qant cil l antant si ot poor si grant

  9. Que il se lesse cheoir de maintenant

  10. Merci li crie contre terre en gisant

  11. Tant li s espee et li vasax la prant

  12. Puis nel toucha ne feri tant ne qant

  13. Mes en prison l enmeinne

  1. Qant Savaris ot rendue s espee

  2. Molt poi ont puis li autre de duree

  3. Ça et la fuient comme gent esgaree

  4. Que il n ont loge ne tante remuee

  5. Et Aymeris lor vient de randonee

  6. Et tuit si home a grant esperonnee

  7. Et d autre part issent sanz demoree

  8. Li ix .baron de la grant tor carree

  9. Apres ceus vont qui la fuie ont tornee

  10. Cui il consivent tost a la vie outree

  11. As Alemanz rendent male sodee

  12. Car vers eus n ont desfanse ne duree

  13. Qui eschapa fete ot bone jornee

  14. Et qui fu pris s ot la teste copee

  15. Fors Savari qui la vie ot tensee

  16. C au vavasor de le grant tor carree

  17. Le dona Hugues a la chiere menbree

  18. Por ce qu il ot sa tor abandonee

  19. As ix .barons qui la vie ont sauvee

  20. Et cil le mist es sa chartre pavee

  21. Tant qu il li ot tel raencon donee

  22. Dont puis fu toz jorz riches

  1. Desconfit sont Alement et ocis

  2. Et en prison fu gitez Savaris

  3. Molt en fist Hugues que preuz et que gentis

  4. Que n en vost prendre vaillant ij .parisis

  5. Ainz le dona au vavasor de pris

  6. Por les barons c avoit en sa tor mis

  7. Et cil en a molt tres grant avoir pris

  8. Et raencon trestot a son devis

  9. Molt par fu liez li frans cuens Aymeris

  10. Qant les barons ot trovez sains et vis

  11. Molt s entrefirent grant joie li marchis

  12. Puis s en tornerent n i ot plus terme quis

  13. Cuens Aymeris et ses barons gentis

  14. Droit vers Pavis vont li conte de pris

  15. Querre Hermenjart la bele o le cler vis

  16. De lor jornees ne quier fere devis

  17. Tant ont erre et par nuit et par dis

  18. C un juesdi main aincois que fust midis

  19. En Pavie entrent li conte et li marchis

  20. Les bons ostieus ont li escuier pris

  21. Et Boniface li fors rois posteis

  22. Lor vint encontre comme frans et gentis

  23. Contre lui est descenduz Aymeris

  24. Con cil qui fu sages et bien apris

  25. Molt se conjoient li prince et li marchis

  26. Par les degrez qui sont de marbre bis

  27. En sont monte el pales seignoris

  28. D une chanbre ist Hermenjart au cler vis

  29. Bien fu vestue et de ver et de gris

  30. Un chapel d or ovre et bien assis

  31. Ot en son chief la pucele gentis

  32. Vers ot les euz cler et riant le vis

  33. Plus bele dame ne vit hom qui soit vis

  34. Nus ne la voit qui toz n en soit pensis

  35. Qant ele voit les chevaliers de pris

  36. Cortoisement les a a reson mis

  37. Cil Damedex qui maint en paradis

  38. Qui toz jorz fu et essera toz dis

  39. Il saut et gart ces dus et ces marchis

  40. Tant voi sor aus et de vair et de gris

  41. Que je ne sai li quiex est Aymeris

  42. Cil de Nerbone qui tant est posteis

  43. Qui por moi est venuz en cest pais

  44. Car viengne avant li frans cuens Aymeris

  45. Si me recoive n i ait plus terme quis

  46. Et qant l antant li cuens si s en est ris

  47. Son mentel giete ne li chaut qui l ait pris

  48. A la pucele a ses braz au col mis

  49. Car molt fu bien enseigniez et apris

  50. Dame fet il par foi le vos plevis

  51. Et bien sachiez que ge sui Aymeris

  52. Qui vostre sire doit estre et vos mariz

  53. S or vos avoie menee en mon pais

  54. Plus de ij .mile de chevaliers de pris

  55. Vos serviroient tot a vostre devis

  56. Granz merciz sire dist la dame au cler vis

  57. Si m eist Dex bien poez estre fis

  58. Que plus vos aim que hom qui soit vis

  59. Plus vos ai dit c a home mes ne dis

  60. Mes por ice ne m en doit estre pis

  61. Dame fet il par le cors saint Denis

  62. Mieuz vos en aim et amerai toz dis

  63. A ces paroles se sont andui assis

  64. Deseure,j,lit covert de paile bis

  65. La parolent ensenble