Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. Dient Lonbart Dex en soit aorez

  2. Biaus sire rois or dont si vos hastez

  3. Dont n oez vos com dient granz fiertez

  4. Tant nos menacent toz nos ont effreez

  5. Ne sont pas home eincois sont vis maufez

  6. Alez biaus sire por Deu si lor donez

  7. Et cest pais molt tost en delivrez

  8. Se vos nel fetes vos en repantirez

  9. A ces paroles s en est li rois tornez

  10. Jusq au pales ne s est pas arestez

  11. Trova sa suer qui molt ot de biautez

  12. De ses puceles avoit o lui assez

  13. Li rois si fu sages et enparlez

  14. Andeus ses braz li a au col gitez

  15. Puis l en apele par molt granz amistez

  16. Ma bele suer vers moi en entendez

  17. Mariee estes se il vos vient a grez

  18. Au plus haut prince qui soit de mere nez

  19. Qui vos envoie querre

  1. En une chanbre qui estoit peinte a flor

  2. Se sist li rois en son pales haucor

  3. Les lui sa suer a la fresche color

  4. Il li a dit belement par amor

  5. Ma bele suer ancui avroiz seignor

  6. Doner vos veil .j .conte pongneor

  7. N a plus vaillant jusqu en Inde major

  8. LX .per de la terre Francor

  9. Vos vienent querre tuit sont duc et contor

  10. En ceste vile ont ja fet tel sejor

  11. Qui a coute vc .mars puis cart jor

  12. Hermenjart l ot si li dist par amor

  13. Frere fet ele nel tenez a folor

  14. Foi que doi Deu le verai criator

  15. Je n avrai ja ne mari ne seignor

  16. Se .j .n en ai qui est de grant valor

  17. C est Aymeris le noble pongneor

  18. Qui tient Nerbone et le pais d entor

  19. Que refuserent li grant et li menor

  20. Tant redotoient la gent Sarrazinor

  21. Et cil la tient par force et par vigor

  22. Et desfant si contre gent paiennor

  23. Q ainz n en perdi demi pie ne plain dor

  24. Et por ice q an le tient au meillor

  25. Ai ge vers lui si tornee m amor

  26. Se ge ne l ai n avrai mari nul jor

  27. Car de celui me puet venir ennor

  28. Antan me quist Herchenbaus de Monflor

  29. Vieuz est li rois si tret mes a foiblor

  30. Mes nel preisse par Deu le criator

  31. Por le tresor Charlon l enpereor

  32. Qu il an poist bien venir desennor

  33. Que ja n eusse a lui pes ne amor

  34. S en venist tost hontage

  1. Frere ce dit la pucele eschevie

  2. Por amor Deu qui tot a en baillie

  3. N aiez vos ja de grant avoir envie

  4. Trop avez vos avoir et menentie

  5. Or vos ennuie la moie conpangnie

  6. Ce poise moi tant sui ge plus marrie

  7. Ne m en queisse a piece movoir mie

  8. Antan me vint querre dedanz Pavie

  9. Cil d Apolice a molt grant baronnie

  10. Ce est rois Otes qui a tant a seignorie

  11. Et Savaris a la barbe florie

  12. Li Alemanz qui cuidoit grant folie

  13. Car mieuz vosisse estre vive enfoie

  14. Que tex viellarz eust ma druerie

  15. Et li dus Aces c a Venice en baillie

  16. Plus a d un an me requiert molt et prie

  17. Si me requiert rois Andreus de Hongrie

  18. Riches hom est ce ne desdi ge mie

  19. .X citez a dedanz sa seignorie

  20. Mes il n avra ja a moi conpagnie

  21. Car il est vieuz s a la barbe florie

  22. Et si est rox et la char a blesmie

  23. Par cele foi que doi sainte Marie

  24. Ne le prendroie por a perdre la vie

  25. Mieuz vodroie estre enz en .j .feu broie

  26. Que ja jeusse lez sa pance flestrie

  27. Si m eist Dex qui tot a en baillie

  28. Je n avrai ja viel home

  1. Dist Hermenjart au gent cors seignori

  2. Biaus sire frere par foi le vos afi

  3. Que ja n avrai en ma vie mari

  4. Se ge nen ai le preu conte Aymeri

  5. Le fil Hernaut au coraje hardi

  6. Que Charlemaine de Nerbone sessi

  7. Qant tuit li autre en furent esbahi

  8. Et tuit en furent del prendre au roi failli

  9. Qant li danziaus en gre la recoilli

  10. Biaus sire frere tot mon panse vos di

  11. Si m eist Dex qui onques ne menti

  12. Je ne desir nul home fors que li

  13. Dist Boniface Jesu Crist en merci

  14. Je ne vos veil doner fors Aymeri

  15. LX .pers a envoiez ici

  16. Qui sont haut home corajeus et hardi

  17. Dedanz Pavie sont passe a cart di

  18. Dist la pucele Deu en aor et pri

  19. Or puis bien dire de bone eure nasqui