Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. Qui ne nos prise la montance d un gant

  2. Ainz nos vait ci par orgueil menacant

  3. Ja somes nos tuit chevalier vaillant

  4. Et mesagier Aymeri le puissant

  5. Au meillor home de cest siecle vivant

  6. Se cist gloton s en vont ainsi gabant

  7. Dont somes nos vaincu et recreant

  8. Armez vos tost trestot de maintenant

  9. Ses asaillons et derriere et devant

  10. Et cil si font n i vont plus delaiant

  11. Endementiers que il vont ranponant

  12. Les armes traient escuier et sergent

  13. Dont lor seignor s armerent erranment

  14. Et d autre part s arment li Alemant

  15. Qant arme sont trestuit a lor talant

  16. Chascuns remonte el destrier auferrant

  17. Et pant au col le fort escu pesant

  18. Et puis s en vont a esperon brochant

  19. Vers la gent d Alemengne

  1. Ce fu en mai que la rose est florie

  2. Que bois foillist et herbe reverdie

  3. Que li mesage aloient a Pavie

  4. Li Alement lor firent asaillie

  5. Qu il ancontrerent es plains de Lonbardie

  6. Mes li mesage sont de grant baronnie

  7. Arme se sont comme gent bien hardie

  8. Vers Alemenz brochent par aatie

  9. Qui trois .c .furent d une connestablie

  10. Et cil lx .mal est l uevre partie

  11. Mes por ice nes refuserent mie

  12. Li vaillant conte qui ont grant seignorie

  13. Ainz les requierent par molt fiere aatie

  14. Et Alement ont lor gent establie

  15. Chascuns en haut Godeherre s escrie

  16. Ainz mes ne fu par itele folie

  17. Tele bataille fete ne commencie

  18. Por Ermenjart la dame de Pavie

  19. Ont commencie le jor tele envaie

  20. Dont plus de .c .en perdirent la vie

  21. Mes Savaris a la barbe florie

  22. Qui la pucele vost avoir a amie

  23. Qant voit les contes et lor grant baronnie

  24. Qui si sont fier et de tel seignorie

  25. Entr eus et soi a mis sa conpangnie

  26. Si vait derriere por ce qu il ne vost mie

  27. Que il eust la premiere envaie

  28. Par devant lui mist sa gent esbaie

  29. Qui de la mort se doute

  1. Savaris fu coarz de grant maniere

  2. Entre sa gent se trest bien loinz arriere

  3. Car n avoit cure de la joste premiere

  4. Prist une lance qui ne fu pas d osiere

  5. Et la bataille commence grant et fiere

  6. Chascuns des contes desploie sa baniere

  7. Les destriers brochent qui corent com levriere

  8. Un Alement devant a l ancontriere

  9. Ala ferir chascuns en tel maniere

  10. Parmi l escu de sa lance pleniere

  11. Nel pot tenir cengle ne estriviere

  12. Que il n en chiee tel .xiij .en la podriere

  13. Qui n ont mestier fors que gesir en biere

  14. Et Savariz qui se fu trez arriere

  15. Esperonna sa grant ive corsiere

  16. Et vait ferir Hugon par de derriere

  17. De Bargelone a la hardie chiere

  18. Brise sa lance ne remest pas entiere

  19. Mes ainz li cuens n en guerpi estriviere

  20. Son cheval torne par la resne dobliere

  21. Vers Savari a tornee sa chiere

  22. Se le trovast bataille i eust fiere

  23. Mes cil s en est tornez fuiant arriere

  24. Por garantir sa vie

  1. Granz fu et fiere la bataille en la plangne

  2. D anbedeus parz crierent lor ensengne

  3. A tant es vos Goniot d Alemengne

  4. Nies Savari de sa seror germaine

  5. Il esperonne la grant ive brehangne

  6. Et vet ferir Aymer de Losengne

  7. Un des meillors de tote la conpengne

  8. L escu li perce et l auberc de Sartengne

  9. Mort le trebuche del bon destrier d Espengne

  10. Grant duel en ont li prince et li chatengne

  11. N i a celui qui forment ne s en plengne

  12. Por lui vengier a desploie s ensengne

  13. De Rosillon Girarz sanz demorengne

  14. Fiert Goniot dont il a grant engengne

  15. Ne li valut l escu une chastengne

  16. Mort l abati del destrier d Alemengne

  17. A tant es vos conte Gui le chatengne

  18. Prant le destrier que il voit en la plengne

  19. Car li suens fu navrez par mi l entrengne

  20. C aler ne pot a plain ne a montengne

  21. Desus celui monte sanz demorengne

  22. Qui molt bien li agree

  1. La bataille ont fierement maintenue

  2. Li mesagier cui Gesu face aiue

  3. De Rosillon Girarz molt s esvertue

  4. Point le destrier qui molt tost se remue

  5. Del fuerre a trete l espee tote nue

  6. Un Alement en fiert qui ot non Hue