Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. De mon pais sera dame clamee

  2. Et s ele m est escondite et veee

  3. Por voir vos di molt ert chier conparee

  4. Eincois que ge m en parte

  1. Sire dist Hugues li preuz et li senez

  2. De Bargelone qui molt fu redoutez

  3. Se il vos plest ja issi nel ferez

  4. Mieudre conseils vos en sera donez

  5. Si le feroiz se croire me volez

  6. Se il vos plest biaus sire or m entendez

  7. Bailleroiz moi .lx .homes armez

  8. A cleres armes a destriers abrivez

  9. Bien soit chascuns vestuz et acesmez

  10. Et de coraje hardiz et adurez

  11. Des plus hauz homes que vos avoir porrez

  12. En vostre terre et aillors les querez

  13. Chascuns soit cuens o princes o chasez

  14. N a si haut home en trestoz ces regnez

  15. Qui tost ne viengne a vos se le mendez

  16. Ja mar soit il de riens vostre fievez

  17. Tant estes vos et cremuz et doutez

  18. Que par amors iront la ou vodrez

  19. Qant les avroiz a Nerbone asenblez

  20. Droit a Pavie au roi les trametez

  21. Ja ne fera tel tans ne tex orez

  22. Que n i soions ainz .xv .jorz passez

  23. Se Boniface est el pales trovez

  24. Bien li sera voz mesages contez

  25. Cele pucele qui tant a de biautez

  26. Requerrons nos avant par amistez

  27. Et s il la vee que il soit tant osez

  28. Nos l anmenrons et si en ait mal grez

  29. Eincois en ert maint escuz estroez

  30. Et maint haubers desrouz et despanez

  31. Et maint Lonbars ocis et desmenbrez

  32. Aymeris l ot si s en est ris assez

  33. Hugues fet il bon conseil me donez

  34. Se vos ce faites que vos me devisez

  35. A toz jorz mes seroiz de moi amez

  36. Si vos donrai .ij .chastiax lez a lez

  37. Dont vos seroiz serviz et ennorez

  38. Sire dist Hugues Vc .merciz et grez

  39. La dame avroiz eincois .ij .mois pasez

  40. Ceanz dedanz Nerbone

  1. Cuens Aymeris n i volt plus delaier

  2. Par ses contrees fet ses mes envoier

  3. As plus hauz homes qui plus font a proisier

  4. Par les mesajes lor fait dire et proier

  5. Que a lui viengnent ainsi com il l ont chier

  6. Se a lui veillent mes avoir recovrier

  7. Et cil si font sanz point de respitier

  8. .LX .per gentil et droiturier

  9. Vindrent a lui aincois .j .mois entier

  10. Et .xx .en ot Aymeris au vis fier

  11. Aveques lui en son pales plenier

  12. Qui a lui sont a boivre et a mengier

  13. Et tuit le tienent por seignor droiturier

  14. Car de lui tienent lor terre a jostissier

  15. Qant sont ensenble li .lx .princier

  16. Cuens Aymeris les prist a aresnier

  17. Seignor baron ne vos doi pas noier

  18. Talanz m est pris que ge prengne moillier

  19. Si m en veil ainz a vos toz conseillier

  20. Si comme a ceus que molt doi avoir chier

  21. Et que molt veil ensenble mercier

  22. Qant de voz terres m estes venu aidier

  23. Une pucele fille au roi Desier

  24. Me loent molt mi baron chevalier

  25. Suer Boniface qui molt fet a prisier

  26. Maint gentil home la sont ale proier

  27. Toz les refusse si com j oi tesmoingnier

  28. N en i a nul dont ne face dengier

  29. Foi que doi vos ja celer nel vos quier

  30. Se ge ne l ai n avrai ouan moillier

  31. Dient li prince Fetes i envoier

  32. De par vos soient .lx .mesagier

  33. Qui pas ne soient ne coart ne lanier

  34. Mes tuit haut home et corajeus et fier

  35. Qui bien savront le mesage noncier

  36. Et eus deffandre se il en ont mestier

  37. S an la vos done ce fet a mercier

  38. Et s an la vee vendue sera chier

  39. Pavie fetes craventer et brisier

  40. Et le pais gaster et essillier

  41. Roi Boniface feroiz vilment tretier

  42. Dist Aymeris Bien fet a ostroier

  43. Dient si home Pansez de l esploitier

  44. Eslisiez les sanz plus de respitier

  45. Toz les mesages que volez envoier

  46. Respont li cuens N avons que delaier

  47. Hugues ira et Garin le lancier

  48. Fouques de Fors et Acharz de Vivier

  49. Li quinz Bernarz et li sistes Gontier

  50. Raoul li semes li huitiemes Braier

  51. Herchanbaut .ix .et .x .a Engelier

  52. A Girart .xj .et xij .a Berengier

  53. A Huon .xiij .et .xiiij .a Bruier

  54. A Milon .xv ..xvj .erent a Renier

  55. Et .xvij .a Buevon le guerrier

  56. Et .xviij .esteront a Garnier