Aymeri de Narbonne

Geste

Aymeri de Narbonne: Numérisation de l'édition de Demaison de 1887 sous la direction de Jean-Baptiste Camps édition numérique Ella Duréault édition numérique Axelle Janiak édition numérique Armâne Magnier , , éd. par Louis Demaison , Aymeri de Narbonne: Chanson de geste : publiée d'après les manuscrits de Londres et de Paris F. Didot et cie Paris 1887 Société des anciens textes français Paris


  1. A ceste estoire dire me plest entendre

  2. Ou l en puet molt sens et essenple prendre

  3. Si vueil un pou de m escience espendre

  4. Por ce que cil si fet trop a reprendre

  5. Qui set le sens et ne le veut aprendre

  6. Car sens reponz ce vos di sanz mesprendre

  7. Senble le feu que l en cuevre de cendre

  8. Qui desoz art et flanbe ne puet rendre

  9. Et por ice dirai sanz plus atendre

  10. Del plus preudome qui fust puis Alixandre

  11. Tres bien le sevent li gregnor et li mendre

  12. Por ce fet mieuz la chancon a entandre

  13. Qu ele est de haute estoire

  1. Ceste chancon seignor dont je vos di

  2. Si est l estoire del preu conte Aymeri

  3. Cil de Nerbone au coraje hardi

  4. Qui tante poine en sa vie sofri

  5. Et vers paiens tant grant estor forni

  6. Crestiente essauca et cheri

  7. Car bien savons que tant com il vesqui

  8. Ne trova il Persant ne Arabi

  9. Qu il ne feist venir a sa merci

  10. En plusors leus avez sovant oi

  11. Que la lingnee qui issi d Aymeri

  12. Puis que Dex ot cestui mont establi

  13. Telle lingnee de nul home n issi

  14. Ne tant preudome ce sachiez bien de fi

  15. Com de cest conte seignor que ge vos di

  16. Bien ait la dame quel porta et norri

  17. Car tuit en furent li pais repleni

  18. Et tuit li leu ce set en bien de fi

  19. Ou Damedeu et si saint sont servi

  20. Bien soit de l eure que tel home nasqui

  21. Tantes proeces sont issues de lui

  22. Que nel diroie en un mois aconpli

  23. De ses bontez ont li plusor oi

  24. Puis que l ot Charles de Nerbone sessi

  25. Mien escient tandis com il vesqui

  26. Ne fu sanz guerre .j .seul an aconpli

  27. Et Damedeu tel loier l en rendi

  28. Que en la fin s amor en deservi

  29. Ce fu haute deserte

  1. Por voir vos di q an iceste chancon

  2. Puet en assez trover sens et reson

  3. Que jadis fu Aymeris tant prodon

  4. Et en sa vie fist tant bien ce savon

  5. Q an doit ses fez tenir a fin sermon

  6. Nes doit oir coarz ne mauves hon

  7. Ne losangiers ne ribaus ne garcon

  8. Car des mauves ne vient se honte non

  9. Oir la doivent chevalier et baron

  10. Et conte et roi et cil de bon renon

  11. Et bone gent qui entendent reson

  12. En abaie et en religion

  13. Doit en oir d Aymeri la chancon

  14. Ja ne la doit deffandre sages hon

  15. Car en toz tans escouter la doit on

  16. Et en caresme et en tote sesson

  17. De lui ne puet nus dire se bien non

  18. Ne del lingnaje qui issi del baron

  19. N oi l en onques dire mauves renon

  20. Veritez est en escrit le trovon

  21. Que d Aymeri et del fort roi Charlon

  22. Doivent mis estre en estoire li non

  23. Car par ces .ij .de verte le savon

  24. Fu deffandue a force et a bandon

  25. Crestiente entor et environ

  26. Se cil ne fusent de verte le dison

  27. Tornee fust tote a perdicion

  28. Crestiente et la loi que tenon

  29. Q an n i creust Jesu Crist et son non

  30. Mes tant fu Charles en sa vie prodon

  31. Fiers et puisanz et de si grant renon

  32. Que .vij .rois ot en sa subjection

  33. Qui tuit tenoient de lui lor region

  34. Et l en servoient a coite d esperon

  35. Par mainte foiz chante vos en a l on

  36. Que maint pais maint chastel maint donjon

  37. Conquist rois Charles a force et a bandon

  38. Maint Sarrazin et maint paien felon

  39. Fist il livrer a grant destrucion

  40. Onques nul jor paien ne Esclavon

  41. N orent vers lui longue deffansion

  42. Jusqu a ceu jor que Rollant le baron

  43. Et Olivier son vaillant conpagnon

  44. Perdi li rois par la grant traison

  45. Que Ganes fist en guise de felon

  46. Qui les vendi au roi Marsilion

  47. Et les .xx .mile q an dit en la chancon

  48. Qui furent mort par si grant mesprison

  49. En la terre d Espangne

  1. Preudom fu Charles a la barbe florie

  2. Grans vertuz fist Dex por lui en sa vie

  3. Dont vos avez mainte chancon oie

  4. Ne trova home de si grant seignorie

  5. Ne amirant ne roi de paiennie

  6. S il ot vers lui ne guerre ne anvie

  7. Qu il n essillast sanz nule garantie

  8. Ou occist en bataille fornie

  9. Nel pot guerir chastel ne tor entie